Í dag starfa ég sem deildarstjóri tölvumála í Korpuskóla en það starf sem liggur þar á bakvið byggist aðallega á því að fá kennara og nemendur skólans til að nota þann tæknibúnað sem til er í skólanum og bæta við tæknibúnaðinn eftir þörfum. Þetta starf gerir það að verkum að ég nota tölvur og annan tæknibúnað daglega bæði í vinnunni og heima hjá mér því ekki þíðir að reyna að innleiða tæknikunnáttu hjá öðrum nema stunda tæknina sjálfur. Hér heima hef ég eina nettengda tölvu sem ég á sjálf sem hefur öll þau helstu forrit að geyma sem ég þarf á að halda. Hún er með vefsíðugerðarforritin Dreamweaver og Frontpage, myndvinnsluforritin Photoshop og Photodraw sem er Microsoft forrit. Microsoft 2000 pakkan og fleiri forrit sem ég nota í mínu starfi og fyrir börnin. Tölvan er nettengd með venjulegu 56k módemi og með skrifara. Vegna starfa minna fyrir Korpuskóla sem tölvuumsjónarmaður þá er mér sköffuð fartölva sem ég nota hér heima og í skólanum. Í henni er samskonar módem, skrifari og DVD drif sem hefur eiginlega ekki verið mikið notað til þessa. Hér heima á ég skanna sem hefur verið mikið notaður síðustu ár, vinn mjög mikið með myndir og skjöl, hef óskaplega gaman af því að breyta myndum, flíkka upp á gamlar myndir og þess háttar. Einnig á ég til mjög góða digital myndavél sem er einnig mjög mikið notuð hér á heimilinu af öllum heimilismeðlimum. Þessa tækni nota ég bæði til að setja myndir út á vef, senda í rafpósti og einnig bara til að prenta út á góðan prentara sem ég átti þar til rétt fyrir jólin þegar ég eftirlét móður minni hann. Það stendur reyndar til að fá sér annan en betri sem verður reyndar erfitt því gamli prentarinn minn af Epson gerð er það tæki sem ég hef notað mikið í gegnum tíðina og er alveg frábær í myndvinnslu.

Tækniæði í Korpuskóla

Í skólanum er ég ásamt öðrum kennurum, dyggilega studd áfram að byggja upp frábært tækniver (því miður vantar bara húsnæðið) til nota fyrir kennara og nemendur. Í skólanum höfum við 32 borðtölvur og 20 fartölvur. Fartölvusettið byggist á þráðlausum samskiptum við innra net skólans en netsambandið í skólanum í sítengt í gegnum línu.net. Í skólanum er einnig digital myndavél, digital vídeóupptökuvél, skanni, tölvutengd víðsjá, væntaleg er vefmyndavél sem hægt er að taka upp 4 mínútna myndbrot inn á og vinna með ásamt því að nota hana sem venjulega vefmyndavél. Við höfum hér líka skjávarpa sem er í aukinni notkun hér, mjög líklega komum við líka til með að eignast "smartboard" töflu sem er einskonar tússtafla sem byggir á gagnvirkni milli tölvu og hvítrar tússtöflu. Nú eftir áramótin var líka keypt dacta legosett sem reynir á stýringar vélmenna í gegnum tölvur. Miðað við upptalninguna hér að framan mætti halda að við séum með tækjaæði í Korpuskóla, vissulega er ég og við með tækjaæði enn aftur á móti þá eru þetta allt tæki sem eru í mikilli notkun í skólanum þó í mismiklu mæli sé. Notkuninn gengur ágætlega með nokkrum vandkvæðum stundum sem eru afgreidd samstundis.

Ég nota internetið mikið til upplýsingaleitar og samskipta innanlands og utan. Kynntist því þó ekki að ráði fyrr en í námi mínu í KHí 1997-1999, byrjaði þá fyrst að nota rafpóst í mjög litlu mæli sendi og fékk ca 20 bréf á þessum þremur árum. Í dag gæti ég ekki hugsað mér lífið án rafpósts, sendi og fæ ca 70-80 bréf á dag og fer fjölgandi. Í mínu starfi þarf ég að skoða forrit o.þ.h. á netinu og sæki mikið forrit þangað.

Þegar ég var gjaldkeri nemendafélags Kennaraháskóla Íslands 1998-1999 fékk ég í fyrsta skipti GSM síma í hendur og hef ekki getað verið án hans síðan. Hneisklaðist mikið af fólki sem notaði þessa tækni áður en ég kynntist henni og faldi símann fyrst eftir að ég byrjaði að nota hann en komst fljótlega að þeirri skoðun að án hans gæti ég ekki verið, þó svo ég noti hann kannski ekki mikið.

Vef setti ég fyrst upp á námskeiði í KHÍ 1997-1998 fyrir sjálfa mig og 1998-1999 fyrir Nemendaráð KHÍ og nemendafélög KHÍ. Ég sinnti minni síðu ekki lengi eftir að námi mínu í KHÍ lauk en byrjaði vinnu aftur við hana síðastliðið sumar til að koma inn efni fyrir kennslu mína í Korpuskóla. Samhliða hef ég verið að vinna síðu fyrir Korpuskóla og fékk núna í nóvember það verkefni að vinna síðu fyrir Smíðakennarafélag Íslands sem er í vinnslu.

Ný tækni

Nú síðast keypti ég mér lófatölvu sem ég er farinn að nota á fullu til að skipuleggja tíma minn, sem er mjög þéttskipaður. Tæknin hefur breytt miklu fyrir mig, hún hefur m.a. gert starf mitt mögulegt þ.e. tölvuumsjónina. Það er eitt vandamál við tölvutæknina og upplýsingaleitina en það er allur tíminn sem fer í þessa vinnu. Það er svo auðvelt að festast tímunum saman í þessari vinnu. Ég gæti aftur á móti ekki hugsað mér lífið án þessarar tækni. Í dag skipulegg ég alla vinnu mína í tölvunni, skrái allt inn, glósur ofl. sem ég lét nægja að skrifa á blöð áður, enda er það þannig í dag að ef ég á ekki minnisnótur inni á tölvunni þá fellur málið í gleymsku eða allavega tekur mig fulllangan tíma að fletta í blöðum til að finna upplýsingarnar.

Framtíðarsýn
Eftir tíu ár sé ég mig tala við tölvurnar í stað þess að nota lyklaborð eins og nú eða snertiskjái eins og á lófatölvunni minni. Sú tækni á eftir að flýta ansi mikið fyrir mér. Ég sé notkunina kannski ekki mikið breytast miðað við hvernig hún er í dag, því ég nota tölvuna til allra þeirra nota sem ég get í dag og gæti hugsað mér að nota hana í. Reyndar hef ég ekki notað vefmyndavél mikið til þessa en það stendur til bóta núna næstu vikur. Ég sé ekki að tölvukennsla í grunnskóla geti farið fram eingöngu í gegnum vef eins og hugmyndir hafa verið uppi hjá fræðslustjóranum í Reykjavík, ekki tæknileysis vegna eða kunnáttuleysis á tæknina, heldur vegna agamála og þörfinni á einstaklingskennslu. Ég get ekki séð fyrir mér einn kennara staðsettan í einum grunnskóla ætla sér að kenna nemendum í tveimur til þremur grunnskólum til viðbótar samtals 40-80 nemendum í einu í gegnum netsamskipti þó svo að myndsamband sé á milli þó svo að kannski væri sá möguleiki æskilegur vegna kennaraskorts. Á heimilinu hefði ég ekkert á móti því að hafa tölvu/vélmenni sem ég gæti látið um að vinna leiðinlegustu verkin á heimilinu ásamt því að geta tímastillt verkefni heimilisins. En þá held ég að komið verði að því að tölvurnar stjórni lífi okkar en ekki öfugt og hvaða gagn höfum við að því.