Ef lína lokast að loknu ferli hefur myndast flötur.  Fyrst var punktur.  Úr punkti myndast lína og með línu myndast flötur.  Flötur hefur lengd og breidd en enga þykkt.  Líkt og lína hefur flötur stöðu og stefnu í myndfleti. Flötur sem hefur stærð, lit og áferð nefnist einnig form.  Form geta verið margvísleg, stór og smá, tvívíð og þrívíð o.s.frv.  Í þessum kafla er einungis fjallað um tvívíð form.
 Staða og stefna forms í myndfleti ákvarðast af sambandi þess við önnur form innan flatarins og samspili þess við neikvæða rýmið.  Staða og stefna forma eru sjáanleg en rými og þyngd eru þættir sem við fremur skynjum en sjáum.  Form taka pláss í rými hvort sem þau eru agnarsmá (punktar) eða stór (fletir).  Rými umhverfis form (neikvætt form) getur verið flatt eða virst hafa dýpt.  Við skynjum mismunandi þyngd forma eftir innbyrðis samhengi þeirra við aðra þætti í myndfletinum.  Ef við sjáum annarsvegar mjóa svarta línu á myndfleti og hinsvegar svartan flöt, t.d. ferhyrndan kassa, skynjum við flötin þyngri heldur en línuna.  Litur og áferð hjálpar okkur líka við að ákvarða hvort okkur finnst form vera þung eða létt.  Dökkur flötur virðist vera þyngri heldur en ljós flötur þó svo að stærð flatanna sé sú sama.
 Hrynjandi er hægt að skapa með formum líkt og með punkti og línu.  Þá þarf formið sem er endurtekið ekki að vera nákvæmlega eins, heldur líkt.  Í því samhengi er einnig hægt að nýta sér svipaða liti og líkar áferðir á formunum.
 Til eru ólík form og áhrif þeirra mismunandi.  Geometerísk form eru regluleg form, eins og t.d grunnformin (ferhyrningur, þríhyrningur og hringur).  Lífræn form eru óregluleg og hafa mjúkar útlínur.  Beinstrikuð form hafa eingöngu beinar útlínur og óregluleg form geta haft bæði mjúkar og beinar útlínur.
  Þegar formum er raðað saman myndast strúktúr.  Til þess að myndbygging gangi upp þarf að huga að mörgum þáttum og samspili þeirra.

Markmið flataverkefnanna er að fá nemendur til að:
1)  þekkja mun á mismunandi gerð forma
2)  dýpka skilning sinn á jákvæðu og neikvæðu rými
3)  mynda strúktúr m.t.t. stöðu, stefnu, lögun, rými og þyngd forma
4)  einangra bút úr mynd m.t.t. myndbyggingar

Nokkur listaverk sem eru hentug kveikja við kynningu á flatarverkefnum.
-Tumi Magnússon, Hunang og síróp, 1993.
-Svavar Guðnason, Fugl og fiskur, 1974.
-Eiríkur Smith, Dögun, 1964.
-Nína Tryggvadóttir, Málverk, 1957.
-Guðmunda Andrésdóttir, Myrkur dagur, 1958.
-Leonidas Maroulis, 68-388,  1988.
-Rothko, Number 10, 1950.
-Kandinsky, A Conglomerate, 1943.
-Mondrian, Composition in Red, Yellow and Blue, 1926