Hér lítur dagsins ljós kennsluefni ætlað til kennslu í myndmennt á mið- og unglingastigi grunnskólans. Meginmarkmið með því er að stuðla að aukinni þekkingu nemenda á grunnþáttum myndlistar og auka um leið orðaforða þeirra á þessu sviði. Við byggjum kennsluefnið á þeirri sannfæringu, að til þess að gera nemendum kleift að tileinka sér og nota hugtök á sviði myndlistar sé mikilvægt að láta þau fást við þau í sinni eigin vinnu. Þannig er námsefnið gert úr garði með það fyrir augum að nemendur öðlist ekki einungis þekkingu á grunnþáttum myndlistar heldur nemi þeir jafnframt orðaforðann sem notaður er til þess að lýsa myndlist.