Um kennsluefnið og markmið þess

 

Upphafið að útgáfu þessa kennsluefnis var að hér á landi var haldið námskeið sumarið 2000 þar sem kynnt var hvernig samstarfi skóla og dagblaða er háttað í Noregi og hvernig Norðmenn nota dagblöð í kennslu. Í framhaldi af því námskeiði var efnt til samstarfs milli dagblaðanna og nokkurra skóla í Reykjavík. Skólarnir fengu send dagblöð fyrir hvern og einn nemenda í eina viku sem unnið var með á margvíslegan hátt. Þetta var reynt í 7. bekkjum og í unglingadeild. Þetta þótti takast vel og því var ákveðið að halda áfram með starfið og koma af stað aukinni samvinnu með markvissara efni að leiðarljósi. Þar sem kynnt var aðallega hvernig unnið er að þessum málum í Noregi byggjum við að mestu leyti á reynslu Norðmanna. Í Noregi hefur samstarf skóla og dagblaða þróast mikið enda hefur það varað í meira en 30 ár.

Við gerð námsefnisins var Aðalnámskrá grunnskóla í íslensku frá 1999 höfð til hliðsjónar. Samkvæmt henni er íslenskan viðamesta námsgrein grunnskólanna enda er íslenskan aðalsamskiptatæki okkar. Traust kunnátta í íslensku er ein meginundirstaða góðrar menntunar. Í Aðalnámskrá segir að mikilvægt sé að nemendur nái góðum tökum á öllum sviðum málnotkunar bæði í ræðu og riti. Nemendur eiga að geta tjáð skoðanir sínar, hugmyndir og tilfinningar og náð þannig góðum tökum á eigin málnotkun. Góð lestrarfærni er nauðsynleg til þess að menn geti tekið þátt í lýðræðisþjóðfélagi. Með lestri stuðlum við að auknum orðaforða og betra valdi á málinu, sem hvort tveggja er mikilvægt í mannlegum samskiptum.

Í Aðalnámskrá segir einnig hvernig við eigum að komast að þessu markmiði þ.e. að ná góðum tökum á tungumálinu. Þar segir að nemendur eigi að fá tækifæri til að leika sér með tungumálið á sem fjölbreyttastan hátt. Þeir eigi að fá tækifæri til túlkunar, tjáningar og sköpunar. Þá eiga viðfangsefnin að vera í samræmi við þroska, hæfileika og áhugamál.

Með því að fá tækifæri til að nota dagblöð í kennslu teljum við komið inn á alla þessa þætti. Kennsluefnið (dagblöðin) er áþreifanlegra en almennar kennslubækur þar sem viðfangsefnið hverju sinni er málefni líðandi stundar. Við leggjum þó ríka áherslu á að vinna með dagblöðin er í flestum tilvikum þverfagleg. Þ.e. komið er inn á marga þætti og er kjörið tækifæri að nýta sér blöðin til að koma inn á sem flestar greinar. Þannig teljum við að á hverjum degi megi finna efni í blöðunum í íslensku, samfélagsfræði, náttúrufræði, íþróttum, kristinfræði, listgreinum, upplýsinga- og tæknimennt og síðast en ekki síst í lífsleikni.

Markmið

Með því að nota dagblöð í kennslu teljum við að námið verði fjölbreytt og lifandi og þar ættu allir að finna viðfangsefni við sitt hæfi.

Markmið með því að nota dagblöð í kennslu eru eftirfarandi:

· Að venja nemendur við dagblaðalestur.
· Að þjálfa nemendur í lestri á mismunandi textum (auglýsingum,
fréttagreinum o.fl.).
· Að venja nemendur við að segja skipulega frá því sem þeir hafa
lesið, bæði munnlega og skriflega.
· Að nemendur temji sér gagnrýna hugsun, spyrji spurninga og leiti
svara.
· Að upplýsa nemendur um margvísleg stílbrigði sem notuð eru við ritun
blaðagreina.
· Að kynna nemendum ritunarferli blaðagreina.
· Að þjálfa nemendur í ritun margvíslegra dagblaðatexta.
· Að þjálfa nemendur í að hlusta á aðra.
· Að nemendur kynnist vinnuferli við útgáfu dagblaðs.