Nýr vefur Sunnulækjarskóla er hér!

*****
Bekkjarvefir:
1. bekkur

Sunnulækjarskóli hjá Mentor

Þegar verið er að leggja grunn að nýjum skóla er mikilvægt að doka við, líta til allra átta og sjá hvað er verið að gera í öðrum skólum sem fellur að því sem við erum að gera.  Til þess að safna í sarpinn er því að döfinni að fara og heimsækja skóla og sjá hvað má læra af þeim sem þar starfa.

Hallormsstaðarskóli
Lækjarskóli
Salaskóli
Ingunnarskóli

Hallormsstaðaskóli

29. janúar s.l. var farið í slíka ferð austur á Hallormsstað og litið á það sem verið er að gera í Hallormsstaðaskóla.  Skólastjórinn, Sif Vígþórsdóttir tók á móti okkur og leiddi okkur um húsnæði skólans.  Síðan var spjallað um hugmyndafræðina og starfið í skólanum og mörgum hliðum velt upp.

Hallormsstaðaskóli er fámennur samkennsluskóli, en það þýðir að árgöngum er kennt saman. Núna eru þrjár deildir eða námshópar í skólanum, 1. – 4. bekkur, 5. – 7. bekkur og 8. – 10. bekkur. Deildarskiptingin er mjög misjöfn eftir árum og fer hún m.a. eftir fjölda nemenda í hverjum árgangi. Þeir aðilar sem standa að skólanum eru sammála um að samkennsla árganga hafi fleiri kosti í för með sér en ókosti enda er hún oftar en ekki skipulögð sem einstaklingskennsla, þar sem hverjum nemanda er kennt á hans forsendum. Einn dag í viku er starfræktur svokallaður opinn skóli, en þá er samkennsluhópurinn allir nemendur í 1. – 10. bekk. Í opna skólanum vinna nemendur allra bekkja saman að fjölbreyttum verkefnum.

Við skólann starfa um 30 starfsmenn, ekki allir í fullu starfi, þar af 12 sem koma að kennslu og stjórnun. Í vetur eru 58 nemendur í Hallormsstaðaskóla.

Lækjarskóli í Hafnarfirði

Þriðjudaginn 2. mars var farið í heimsókn í Lækjarskóla í Hafnarfirði.  Lækjarskóli er í nýju húsi sem tekið var í notkun haustið 2002. Sömu arkitektar teiknuðu Lækjarskóla og nýja skólann á Selfossi. Tilgangur ferðarinnar var fyrst og fremst að skoða innanstokksmuni og búnað skólans í fylgd arkitektanna.  Skólastjóri Lækjarskóla er Haraldur Haraldsson og tók hann á móti okkur ásamt aðstoðarskólastjóranum Höllu Þórðardóttur. 
    Auk þess að skoða húsið og innastokksmuni ræddum við við kennara og starfsmenn skólans um hvernig til hefði tekist í innkaupum á húsbúnaði sem að þeim snýr.  Ferðin var afskaplega lærdómsrík og var okkur bent á margt sem hægt er að gera og annað sem gott væri að forðast.

Salaskóli í Kópavogi

Í Salaskóla tóku á móti okkur Hafsteinn Karlsson, skólastjóri og Hrefna Björk Karlsdóttir, aðstoðarskólastjóri.  Þau fylgdu okkur um skólann og heimsóttum við bekkjardeildir á öllum skólastigum, bæði í bóklegri og verkelgri kennslu.  Einnig litum við í einni af smiðjunum sem nemendur vinna í.  Smiðjurnar eru vinnutímar þar sem nemendur stunda nám í aldursblönduðum hópum þvert á aðra deildarskiptingu skólans.  Nemendur fá þá tiltekið verkefni tengt viðkomandi smiðju og fást við það 3 kennslustundir á dag, þrjá daga vikunnar í þrjár vikur.  Þannig eru 27 kennslustundir teknar saman og tiltekið verkefni unnið á þeim tíma. Ein slík smiðja jafngildir því stundafjölda tveggja vikustunda í eina önn.  Í smiðjunum er bæði fengist við verklega og bóklega þætti námsins.

Eftir skoðunarferð um skólann settumst við svo niður og ræddum um ýmis mál, s.s. teymisvinnu kennara, fundafyrirkomulag, fyrirkomulag foreldrasamstarfs, gerð námsáætlana og fyrirkomulag námsmats.  Þá var rætt um margt sem tengist því að hefja skólastarf í nýjum skóla þar sem allt er nýtt og ekki er hægt að ganga í uppsafnaðar birgðir fyrri ára.  Af þessu hafa Hafsteinn og Hrefna reynslu því Salaskóli hóf störf í nýju húsi haustið 2001.

Ingunnarskóli

Ingunnarskóli hóf störf í samtengdum bráðabirgðarstofum haustið 2001 með um 35 nemendum. Næsta haust voru í skólanum 100 nemendur og í vetur eru þeir um 200.  Búist er við að skólann sækji um 400 nemendur næsta haust.  Skólinn er enn starfræktur í færanlegum kennslustofum en flutt verður inn í fullbúið nýtt skólahús haustið 2005.  Nýju skólahúsi er lýst með eftirfarandi hætti:

Í Ingunnarskóla munu heimasvæði leysa hefðbundnar kennslustofur af hólmi að miklu leyti. Í skólanum verða fimm heimasvæði. Í hverju þeirra verður að finna vinnustöð fyrir hvern nemanda, hópvinnusvæði og/eða vinnusvæði tengd ákveðnu fagi, samverustað, litla kennslustofu eða hópherbergi þar sem hægt er að vinna í næði með allt að 14 nemendum. Þar verður einnig að finna vinnuaðstöðu fyrir kennara og starfsfólk heimasvæðisins. Búast má við að á hverju heimasvæði starfi sex til níu starfsmenn. Auk heimasvæðanna verða í skólanum tvö rými til að sinna listgreinum, heimilisfræðistofa, námsver (sérkennsla) og tónmenntastofa. Þessu til viðbótar er það sem í flestum skólum er að finna s.s. stjórnunarrými, bókasafn, matsalur, salur með sviði, íþróttahús o.fl. Í skólanum mun væntanlega starfa útibú frá tónlistarskóla en gert er ráð fyrir að nemendur geti stundað tónlistarnám á skólatíma í tveimur kennslustofum.

Eftir að hafa gengið um stofur og ganga með Guðlaugu Sturlaugsdóttur, skólastjóra, settumst við inn í fundaherbergi og ræddum fyrirkomulag kennslu, gerð námsáætlana, skráningu námsframvindu, teymisvinnu kennara og þann stjórnunarramma sem um hana gildir.  Þá var rætt um gerð búnaðarlista og þau verkefni sem fylgja því að hefja störf í nýju skólahúsi.