Ég kenni við grunnskóla, það hef ég gert í 18 ár og minn reynsluheimur kemur þaðan. Skólinn heitir Brautarholts- og Gnúpverjaskóli. Tölvuvæðingin gekk mjög hægt til þess að byrja með, skólinn eignast fyrst mac-vélar eins og flestir skólar á þeim tíma. Við vorum nokkrir kennarar sem kynntum okkur þennan möguleika fyrst og sáum ný tækifæri. En tölvurnar voru ekki endurnýjaðar og þannig stöðvaðist þróunin hjá okkur. Tölvurnar voru mest notaðar til ritvinnslu. Tölva á kennarastofunni var nettengd fljótlega en nemendatölvurnar voru ekki nettengdar fyrr en árið 2000. Nú í haust fengum við nýjar tölvur inn í stofurnar, nettengdar. Ég get ekki sagt að ég líti á sjálfa mig sem fagmann í þessari grein því að ég hef aldrei kennt upplýsinga- og tæknimennt. En af því skólinn er lítill hef ég fengið tækifæri til þess að fylgjast mjög mikið með þeim verkefnum sem eru í gangi hverju sinni. Gnúpverjaskóli hefur í nokkur ár tekið þátt í nýsköpunverkefni Innoed þar sem tölvurnar eru mikið notaðar, bæði til þess að senda inn hugmyndir, teikna og hanna eða fara í sýndarveruleika.

Ég hef áhuga á að nota tölvurnar mest sem stuðning við kennslu, mér finnst þær gefa góða möguleika til þess að skoða námsefni frá öðru sjónarhorni en það sem ég kem með. Nemendur fá líka tækifæri til þess að sökkva sér niður í hluti sem þeir hafa áhuga á. Ég kenni mest í 6. og 7. bekk en ekki hafa allir nemendur möguleika á að komast í tölvu heima hjá sér.

Í textílmennt hef ég notað danskan vef sem hugmyndaauka fyrir nemendur. Þar er reyndar margt fleira en textílmennt, en ég hef bara notað þann hluta mest. Ég fer með nemendur inn á síðu um flísagólf í Thorvaldssafninu í Kaupmannahöfn. Mér finnst tilvalið að nota Thorvaldsen, og kynna nemendum hann í leiðinni. Nemendur velja flottasta gólfið og sauma það út í krosssaum. Stelpum jafnt sem strákum þykir gaman að þessu. Ég nota forritið Fleksnet frá danska fyrirtækinu Orfeus ef ég þarf að prenta út munstur eða teikna það upp.

Í dönsku hef ég notað skólavefinn, reyndar er ég svolítið leið á villum sem þar eru og sem angra mig. Mér finnst að ég þurfi alltaf að vera að segja nemendum mínum hvað er vitlaust áður en þeir byrja. En það er ekki mikið efni á netinu, fyrir byrjendur í dönsku, þess vegna held ég áfram að nota skólavefinn.

Í stærðfræði nota ég mest efni frá námsgagnastofun sem ýtarefni. Ég nota það þegar nemendur eru búnir með tiltekin atriði, en þurfa meira æfingu eins og í hnitakerfi.

Mér finnst best að nota tölvurnar til stuðnings í kennslunni og ég er viss um að Menntagátt menntamálaráðuneytisins á eftir að nýtast mér vel.

Ég hef unnið eitt samskiptaverkefni en reikna ekki með að framhald verði á því. Það tengdist náttúrufræði þar sem ég var í samvinnu við danskan skóla, Taarbækskole. Dönsku nemendurnir tóku þátt í keppni um Ísland. 6.bekkurinn minn sendi myndir af umhverfinu okkar hér í Skeiða- og Gnúpverjahreppi. Við skrifuðum líka bréf á dönsku, en af því að nemendurnir eru ekki farnir að læra neina dönsku, þurfti ég að hjálpa mikið. Því miður vann Taarbækskole ekki.

Til gamans má geta að það eru margar skemmtilegar tilraunir á vefnum um Vildfred. Vildfred er danskur vefur sem inniheldur efni um náttúrufræði.