Tímaþjófar

Þar sem fjarneminn tekur sjálfur ábyrgð á sínum tíma er auðvelt að misnota hann. Oftar en einu sinni hefur komið fram að við fjarnám skiptir tímaskipulag miklu máli, er rétt að líta á nokkra tímaþjófa.

Frjáls umræða. Slík umræða, sem ekki tengist náminu, en fer fram í tölvum er nauðsynleg; skapar kynni og skemmtun. En hún getur orðið allmikil og tímafrek. Finndu þinn meðalveg hér.

Tölvupóstur/korkar og spjallrásir. Samskiptin fara mest fram með þessum hætti og eru fremur tímafrek sökum þess að þau fara fram í rituðu máli. Aðalmálið er að vera ekki á eftir öllu né öllum. Það er óþarfi að svara öllum bréfum á sameiginlegum svæðum og vera að eltast við allt sem inn kemur.

Netið. Að sækja einfaldar upplýsingar á Internetið getur tekið langan tíma ef maður kann ekki á leitarvélar. Þá er mikið af skemmtilegu og fróðlegu efni sem hægt er að gleyma sér í tíma og ótíma. Sumir hafa ósjálfráðar venjur þegar þeir fara á Internetið t.d að skoða póstinn, fréttir á mbl.is, skoða veður,sjónvarpsdagskrá og einhverjar uppáhaldssíður. Þetta er stundum gert oft á dag. Athugaðu hvað þú eyðir miklum tíma bara í slíkar venjur á netinu.

Fókus á tæknina. Algengt er að verða tækniglaðir við tölvuvætt fjarnám. Miklum tíma er þá varið í að skoða tæknimöguleika eða setja upp nýjan vél- eða hugbúnað á tölvuna.

Tæknilegir erfiðleikar. Ef þú siglir í strand og getur ekki bjargað þér í tæknimálum, skaltu ekki eyða miklum tíma í að reyna að bjarga þér sjálfur, nema þú hreinlega hafir mjög mikinn tíma. Fyrsta úrræði eftir frumtilraun til þess að bæta vandann er að leita aðstoðar.