Umhverfið
Þegar þú hefur tekið ákvörðun um að fara í fjarnám og hefur fengið inni í þeim námsáfanga sem þú ætlar þér skaltu strax byrja að skipuleggja þitt eigið námsumhverfi.

Farðu yfir tæknimálin ! Athugaðu hvort þú sért með allan þann tölvubúnað sem krafist er í námsáfanganum. Sæktu þér skýrsluform og útfylltu það. Reyndu að gera þér grein fyrir veikum hliðum og sterkum. Settu og niður nokkur orð um hver næstu skref þín í tæknimálum verða næstu misserin.

Mótaðu tölvun ! Best er hafa til umráða eigin tölvu. Að deila tölvunni með einum eða fleiri getur skapað vandamál. Þetta fer þó eftir því hversu mikið námið er og tímafrekt. Gerðu tölvuna persónulega með því að skipuleggja gagnaskrár eftir þínu höfði, sæktu skjámyndir af netinu sem lýsa þér. Gefðu tölvunni þinni jafnvel nafn og vertu óhræddur að tala við hana. Tölvan talar hvort eð er nokkuð við þig. Hún gefur hljóðmerki, birtir hjálparglugga, viðvörunarglugga og ofl. Því vænna sem þér þykir um tölvuna því betur áttu með að sitja með henni og vinna.

Hugaðu að annarri aðstöðu ! Gerðu ráð fyrir stað þar sem þú og tölvan getið fengið gott næði saman. Varast skaltu gluggalaus skot eða afkima. Dagsbirtan hefur jákvæð áhrif á hugann og það er upplífgandi að hafa bjarta vinnuaðstöðu. Gerðu alltaf ráð fyrir að geta verið í símasambandi þótt þú sért á Internetinu, t.d með GSM, ISDN eða ADSL. Gerðu ráð fyrir hillum fyrir bækur og gögn.