Vefleiðangur í stærðfræði

fyrir nemendur í 8. - 9. bekk grunnskóla

Kynning

Verkefnið er hugsað sem samþætting stærðfræði og upplýsingatækni. Í því felst upplýsingaleit á bókasafni og/eða veraldarvefnum. Auk þess fá nemendur kennslu í að taka myndir og vinna með þær.

Markmið að nemendur:

• verða hæfari í að leita sér upplýsinga í bókum og á netinu

• skilgreinda með eigin orðum hvað ýmis stærðfræðihugtök þýða og læra að nota tungumál stærðfræðinnar

• geri sér grein fyrir hve víða stærðfræði er að finna í umhverfinu

• þjálfast í hópvinnu og sameiginlegri ábyrgð

• þjálfast í að greina skipulega frá niðurstöðum sínum, bæði munnlega og skriflega

• greina myndrænt stærðfræðileg viðfangsefni í umhverfi sínu í gegnum myndavél

Verkefni

Þið eigið að búa til veggspjöld sem skilgreina stærðfræðihugtök. Þið eigið að kynna veggspjaldið fyrir öðrum nemendum í bekknum. Jafnframt eigið þið að semja texta sem dreift verður til allra bekkjarfélaga.

Þið fáið stafræna myndavél og eigið að taka myndir í nágrenninu til að skýra hugtakið myndrænt. Jafnframt lærið þið hvernig nota má tölvutækni í vinnslu með myndir. Þið skuluð gera tímaáætlun fyrir hvern verkþátt og skipta með ykkur verkum. Skráið hjá ykkur í dagbók allt vinnuferlið t.d. hvað er ákveðið hverju sinni, hvað hver á að gera, hvað gekk vel, hvað gekk illa, hvað hver hefur gert og munið að dagsetja hverja skráningu
Gerið heimildalista yfir allar heimildir sem þið notið

Bjargir

Til að leysa verkefnið þurfið þið á ýmis konar upplýsingum að halda. Þið þurfið einnig stafræna myndavél. Ef þið hafið ekki tekið myndir með slíkri vél áður eru hér upplýsingar. Stafræn myndvinnsla

Þið eigið að leita að upplýsingum um hugtökin á netinu og í alfræðiorðabókum.

Hér eru nokkrar vefslóðir sem hjálpa ykkur að skilgreina hugtök stærðfræðinnar.

Vísindavefur Orðabók Háskóla Íslands

Orðasafn stærðfræðisfélagsins

Gaglegir vefir Leit.is Skólavefur

vefur Freudenthalstofnunarinnar

Heilabrot Hugtök í stærðfræði

Ferill

Þið eigið að vinna að verkefninu í 2 – 4 manna hópum og skipa hópstjóra og ritara.

Það sem á að koma fram á veggspjaldi:

• skilgreining á stærðfræðihugtakinu

• mynd/myndir sem skilgreina hugtakið

• frásögn um hvenær/hvar viðkomandi hugtak er notað í daglegu lífi.

• vangaveltur um hvers vegna þið haldið að allir grunnskólanemar eigi að læra þennan þátt stærðfræðinnar.

Þegar veggspjaldið er tilbúið verður munnleg kynning þar sem hver hópur segir frá viðfangsefninu sem hann vann með. Skráið upplýsingar um viðfangsefnið á blað, sem aðrir nemendur fá með sér heim.

Hóparnir skipta með sér verkum, til dæmis:

hópur 1 fjallar um prósentur
hópur 2 fjallar um almenn brot
hópur 3 fjallar um tugabrot
hópur 4 fjallar um algebru
hópur 5 fjallar um flatarmál
hópur 6 fjallar um rúmmál

Mat

Þetta er hópverkefni. Kennari gefur einkunn fyrir frammistöðu og frumkvæði hópsins. Virkni einstaklinga innan hópsins og samvinna verður metin sérstaklega.

Öll vinna er metin til einkunna. Símat fer fram á meðan á vinnuferlinu stendur. Metið er hvernig einstaklingum gengur að vinna saman og komast að samkomulagi. Dagbókin, afraksturinn og kynningin sem fram fer í lokin er metin hjá hópnum í heild. Vinnuframlag einstaklings er metin eftir dagbókinni og einnig með athugun á meðan á vinnunni stendur.
Hver einstaklingur skilar sjálfsmati til kennara þar sem hann metur sitt framlag og hvernig honum finnst hafa til tekist.

Öllum gögnum ber að skila og verða þau einnig metin í heildareinkunn.

Niðurstaða

Kæru nemendur.
Nú ættuð þið að hafa komist að því að stærðfræði er að finna alls staðar í kringum okkur. Við erum ávallt að nota hana án þess að gera okkur grein fyrir því.
Þið hafið einnig komist að því að vinna við veggspjöld og markvissa upplýsingaleit krefst mikillar og náinnar samvinnu ykkar.

Vonandi hafið þið haft gagn og gaman af verkefninu.