Kópavogur

Listasafn Kópavogs - Gerðarsafn Í Kópavogi eru starfrækt þrjú myndarleg söfn, þ.e. bókasafn, náttúrufræðisafn og listasafn auk tónlistarhúss sem er hluti af menningarmiðstöð bæjarins sem nú rís á Borgarholtinu.

Bókasafn Kópavogs var stofnað vorið 1953 og árið 1981 flutti það í núverandi húsnæði að Fannborg 3-5. Náttúrufræðistofa Kópavogs var opnuð í desember 1983. Meginuppistaða safnsins er skeldýrasafn keypt af Jóni Bogasyni. Þá er í safninu gott fugla- og steinasafn. Í safninu eru einnig fjögur stór fiskabúr með lifandi lífverum, fiskum og hryggleysingjum.

Listasafn Kópavogs - Gerðarsafn, sem ber nafn Gerðar Helgadóttur myndhöggvara, var opnað í apríl 1994. Síðan safnið tók til starfa hafa þar verið haldnar á annað hundrað myndlistarsýningar af ýmsu tagi, fjölmargir tónleikar, bókmenntakynningar og önnur menningarstarfsemi farið þar fram.

Tónlistarhús Kópavogs - Salurinn er við hlið Gerðarsafns og er salurinn sérstaklega hannaður fyrir hvers kyns tónlistarflutning og þykir hljómburður þar með miklum ágætum. Salurinn var tekinn í notun 2. janúar árið 1999.