Námsumhverfi á vefnum

Námsumhverfi á vefnum

Á námskeiðinu Upplýsingatækni í menntun og tölvumenning í skólum (UMTS) fyrir áramót vorum við þrjár, Guðfinna G. Guðmundsdóttir, Guðfinna Emma Sveinsdóttir og Helga Svavarsdóttir sem unnum saman verkefni sem við nefndum Upplýsingatæknin og söguaðferðin http://www.ismennt.is/not/ggg/kynning.htm og ætlum við (þ.e. Guðfinnurnar tvær með góðfúslegu leyfi Helgu) að byggja á þeirri vinnu við okkar tillögu að námsumhverfi á vefnum.

Vefleiðangrar hafa verið nýttir í mörgum námsgreinum. Söguaðferðin er kennsluaðferð sem hefur reynst mörgum kennurum og nemendum þeirra mjög vel og með því að flétta þessar aðferðir saman og nýta þá möguleika sem tæknin býður upp á er hægt að gera góða aðferð enn betri. Þegar verið er að vinna verkefni samkvæmt söguaðferðinni er mikilvægt að afla gagna og ættu möguleikar á að afla efnis á Netinu að geta komið sér vel. Í söguaðferðinni er lögð áhersla á að kenna nemendum sjálfstæð vinnubrögð, að afla sér upplýsinga og miðla því sem þeir hafa lært. Þessi vinnubrögð henta vel við nám á Netinu.

Þegar vefleiðangri og söguaðferð er fléttað saman má hugsa sér vefleiðangur sem er hannaður út frá hugmyndafræði söguaðferðarinnar. Hugmyndin sem sett verður hér fram byggist á því að vefleiðangurinn verði settur fram á vef sem staðsettur er á Netinu. Við köllum vefinn Ævintýravefinn og má sjá hugmynd að útliti vefsins á slóðinni http://www.andakill.is/helga/aevintyravefur Á upphafssíðu Ævintýravefsins verður að finna vefleiðangur með krækjusafni, söguramma (söguþráð), upplýsingar til þátttakenda, foreldra og kennara um verkefnið. Vísað verður í markmið aðalnámskrár og tengingar verða í vefsíður hópanna sem eru að vinna verkefnið, en það geta verið hópar í mismunandi skólum. Gert verður ráð fyrir spjallsvæði eða vefráðstefnu þar sem nemendur geta skipst á skoðunum og miðlað þekkingu um verkefnið óháð staðsetningu.

Á vefnum verður miðstöð verkefnisins. Nemendur fara inn á síðuna til að fá fyrirmæli en verkefnið gengur út á að þegar ákveðið verkefni hefur verið leyst þá fá nemendur næstu fyrirmæli. Hver kafli hefur ótakmarkaða möguleika þar sem hver nemandi getur kannað og lagt fram sinn skerf út frá eigin reynslu og hugmyndum. Á vefinn bætast síðan við lykilspurningar, upplýsingar og ævintýri, gjarnan í formi óvænts atburðar sem sögupersónurnar lenda í eftir því sem sagan heldur áfram. Nemendur geta tekið þátt í verkefninu út frá eigin þroska og getu og skoðað verkefnin meðan þau eru í vinnslu og rætt saman um þau. Tölvutæknin gerir okkur kleift að hafa innleggin ólík milli hópa þannig að verkefnin þróast í ólíkar áttir vegna mismunandi atburðarrásar hjá hverjum hópi. Þannig geta nemendur ekki hermt beint eftir öðrum hópum og einnig verður spennandi að sjá mismunandi þróun verkefna með sama upphaf.

Nemendur vinna heimasíðu jafnóðum og þeir vinna verkefnið. Á heimasíðu hópsins kemur fram atburðarásin sem sögupersónur lenda í ásamt úrlausnum á verkefnum. Verkefnin verða miðuð við að þjálfa nemendur í upplýsingatækni og taka mið af makmiðum aðalnámskrár þar um. Þrátt fyrir það er gert ráð fyrir að halda í aðrar vinnuaðferðir sem reyna á sköpun og aðra færni. Má t.d. nefna að teikna og skanna myndir, taka stafrænar myndir og útbúa ýmsa hluti. Áhersla verður lögð á að hafa verkefnavinnuna fjölbreytta og nýta bæði möguleika tækninnar og hugmyndaflug og sköpunargáfu nemenda. Hægt er að fara í vettvangsferðir og þá er upplagt að taka myndir og bæta við safnið þegar heim er komið. Myndirnar er hægt að taka á venjulega myndavél, stafræna vél eða myndbandsupptökuvél.

Til að nemendur bæti við þekkingu sína og tileinki sér námsefnið betur er hugsanlegt að þeir vinni verkefni við hver kaflaskil. Þeir geta t.d. sent þau til kennarans sem fer yfir þau og bendir nemendum á hvað megi betur fara. Einnig er hægt að útbúa gagnvirk verkefni sem nemendur vinna til að meta eigin árangur.

Möguleiki er á að láta nemendur halda dagbók á Netinu og gefa þeim þannig tækifæri til að tjá hug sinnar persónu meira en tími gefst til í kennslustundum. Þá eru slík skrif þjálfun í ritun.

Kynning á verkefninu getur verið margvísleg. Foreldrar geta heimsótt bekkinn sem kynnir vefsíðuna og ævintýri sín, einnig er hægt prenta út efnið og safna á veggspjald á hefðbundinn hátt. Tilvalið er að fá sérfræðing í heimsókn og getur þá kynning farið fram í kennslustofu en einnig væri hægt að nota fjarfundabúnað. Einnig væri hægt að hafa vefráðstefnu t.d. á spjallrás á Netinu þar sem nemendur ræða saman um verkefnið. Hægt er að bjóða foreldrum og/eða sérfræðingi þátttöku í ráðstefnunni.

EFST Á SÍÐU