UT2003

Föstudagurinn 28.febrúar.

Ráðstefnan var haldin í Verkmenntaskólanum á Akureyri. Var hægt að hlusta á fyrirlestra og taka þátt í málstofum og fara á sýningar. Einnig voru fyrirtæki með kynningar á nýrri tækni sem nýst gæti kennurum.

Opnunarávarp var flutt af menntamálaráðherra, Tómasi Inga Olrich.

Nýr samstarfsvefur fyrir kennara á öllum skólastigum var opnaður og nenfist hann menntagatt.is.

Eftir opnunaratriðin kom Guðrún Þengilsdóttir nemandi í Menntaskólanum á Akureyri með erindið “Að vera eða vera ekki – með fartölvu – í fartölvubekk”. Hún hafði kynnst því að vera fyrsta árið í MA án fartölvu, næsta ár var hún í fartölvubekk og þriðja árið var hún ekki í fartölvubekk. Ræðan hennar og hennar sýn var mjög athyglisverð. Hún var ekki sérlega hrifin af fartölvuvæðingunni og gat ekki alveg séð ástæðu þess hvers vegna nemendur sem áttu borðtölvur heima þyrftu endilega að kaupa fartölvur til að hafa með sér í skólann. Reynslan af fartölvuvæðingunni varð sú að kennsluaðferðir breyttust ekki, tölvan nýttist fyrst og fremst sem glósutæki og töskurnar urðu allt of þungar með tölvunum í. Margir nemendur hættu smám saman að bera tölvurnar með sér í skólann. Hún taldi að meðan tölvurnar gætu ekki komið í stað skólabóka væru þær ekki nauðsynlegar. Nemendur þyrftu að kaupa allar bækur eins og áður og tölvan var hrein viðbót við innkaupalistann.
Þar sem tölvan nýttist helst var:
· Umræður á netinu í sögu og íslensku
· Vefleiðangarar
· Efnafræðileikir og efnafræðiforrit (til skemmtilegt efni)
· Gagnvirk netverkefni
Helstu gallar.
· Aukaþyngd
· Snúrur
Það sem hún kallaði eftir til að þessi nýja tækni myndi nýtast var að upp yrði fundið nýtt kennslukerfi fyrir nýja tíma og öðruvísi stundatöflur.

Eftir opnunaratriðin fór ég í málstofuna "Námsefnið á netið" þar sem Frosti Heimisson kynnti margmiðlunarforrit sem hann er að selja sem heitir Mediator 6 og 7. Þetta er forrit sem gerir kennurum auðvelt að útbúa gagnvirkt efni á netið. Það nýtist í að forrita fullkomið margmiðlunarefni og gerir engar kröfur um forritunarkunnáttu. Forritið býður upp á að færa verkefni beint á vefinn í FrontPage. Það er auðvelt að nota með FP eða álíka forritum og til að útbúa fullkominn geisladisk. Sýndi tvö verkefni sem hann hafði sjálfur unnið. Þekkir þú Ísland? og Þekkir þú stafina? Hann sagði að spilið Viltu vinna milljón hefði hann unnið í þessu forriti. Forritið kostar 300 pund fyrir skólaleyfi fyrir 20 nemendur og heimanot kennara. Hann sagði að hægt væri að kenna krökkum á þetta forrit og það þjálfaði rökhugsun.
Ég varð fyrir vonbrigðum með þessa málstofu þar sem ég upplifði þetta sem sölukynningu á þessu eina forriti og það virtist vera ýmsum anmörkum háð hvort þetta myndi virka í því umhverfi sem við störfum við. Það vantaði alveg kynningu á innihaldi þessarar málstofu í þeim pappírum sem ég var með. Einnig fannst mér innleggið of stutt.

Síðan fór ég málstofu Hólmfríður Sigþórsdóttur kennara í Fjölbrautaskóla Garðabæjar þar sem fjallað var um "vefleiðangra í vistfræði". Hún hefur ekki bækur til að kenna og hefur gripið til þess ráðs að nota vefleiðangra til að uppfylla áfangamarkmiðin. Til eru margir góðir vefir frá rannsóknarstofnunum víða um land sem hún getur nýtt sér. Hún skipulagði námið þannig að hún kennir eina kennslustund í viku í tölvustofu og þá eru nemendur í vefleiðöngrum. Þetta voru samtals átta vefleiðangrar, gróðurleiðangur, vatnaleiðangur, fjöruleiðangur, sjávarleiðangur, fuglaleiðangur, spendýraleiðangur, jarðvegsrof....
Tók hún sérstakt dæmi um spendýraleiðangur þar sem hún sýndi okkur skemmtileg spil sem nemendur hennar höfðu unnið í kjölfarið. Nemendur fengu fjórar aukastundir til að búa til spilið og gerðu það líka í heimavinnu. Þau gáfu spilið nemendum í sérdeildinni. Notaði jafningjamat í þessu verkefni. Þegar nemendur unnu vefleiðangrana notuðu þeir copy/paste aðferðina. Setti hún fljótlega þá kröfu að þeir yrðu að umorða svörin og segja af hvaða heimasíðu þau væru fengin.
Reynslan af þessari kennslu var að mörgu leyti góð. Hins vegar fannst henni átta vefleiðangrar of mikið þar sem nemendur þreyttust á þeim. Það er með þessa kennsluaðferð eins og allar aðrar, það er tilbreytingin sem skiptir máli.
Þarna fannst mér hún hafa allt of stuttan tíma fyrir kynninguna þar sem hún mátti aðeins tala í 15 mínútur. Hún þurfti að stikla á mjög stóru.

Laugardagurinn 1.mars.

Laugardagurinn hófst með fyrirlestri Jóhanns Guðna Reynissonar sem hann nefndi "Ég lifi í draumi...". Því miður missti ég af upphafinu en það sem ég heyrði var mjög áhugavert. Fjallaði hann um draumsýn sína á upplýsingatækniþjóðfélagið og landsbyggðina.

Kl. 10:00 fór ég á fyrirlestur Sólveigar Jakobsdóttur um "Tölvumenningu íslenskra skóla 2002 – höfum við gengið til góðs?" Þessi fyrirlestur var mjög góður og hefði Sólveig getað talað enn lengur, en tíminn nægði ekki. Ég tók þátt í þessari rannsón og gerði þarfagreiningu út frá niðurstöðum úr mínum skóla og fannst áhugavert að sjá að hennar niðurstöður voru mjög svipaðar.

Kl. 11: 00 var fyrirlestur Svíans Johans Strid "Living in the future, implications of the information age" sem fór fyrir ofan garð og neðan, meðal annars vegna sívaxandi hávaða allan hringinn í kringum Gryfjuna. Mér fannst kjarninn í hans málflutningi vera að það væri mjög erfitt að skipuleggja framtíðina út frá núinu, þar sem þróunin væri svo ör að við næðum ekki í skottið á henni.

Kl. 13:00 fór ég á athyglisverðan og mjög góðan fyrirlestur sem Björn Sigurðsson úr Menntamálaráðuneytinu hélt um "Hvaða gagn geta kennarar haft af norræna og evrópska skólanetinu?"

Kl. 14:00 fór ég á fyrirlesturinn "Úttekt á íslenskum vefsíðum" þar sem Ásrún Matthíasdóttir lýsir rannsókn á íslenskum vefsíðum. Fannst mér sá fyrirlestur áhugaverður þar sem ég hef í vetur þurft mikið að velta fyrir mér útliti vefsíðna bæði hvað varðar vefsíðu skólans sem ég vinn við og minnar eigin. Fékk ég þarna svar við mörgum spurningum um leið og nýjar urðu til.

Síðustu tveir fyrirlestrarnir eru þeir fyrirlestrar sem ég ætla að segja betur frá og mun umfjöllunin verða birt á vefsíðunni minni.

Það sem mér finnst athyglisverðast af því sem ég kynnti mér á ráðstefnunni er hvaða gagn ég get haft af evrópska og norræna skólanetinu, auk þess sem ég er spennt að sjá hvernig menntagatt.is þróast. Það voru margir fyrirlestrar eða málstofur sem ég hefði viljað fara á að auki, sérstaklega þeir þar sem fjallað var um fjarkennslu. Fjarkennslan er svið sem mér finnst spennandi og á eftir að skoða betur seinna. Það er nú víst þannig að ekki hægt að gera allt samtímis. Ég hefði viljað hafa meiri tíma til að skoða sýningarsvæðin og kynna mér það efni sem þar var kynnt. Einnig voru kynnt mörg kennsluforrit sem hefðu gagnast mínum skóla, sem ég gaf mér ekki tíma til að fara á. Má þar nefna Bókaormar á Netinu, Fjaran og hafið, Af fingrum fram með Legó, Sjáðu sæta skjáinn minn, Gagnvirkar skólatöflur, Margmiðlun í kennslu nemenda með sérþarfir o.s.frv. Vonandi gefast önnur tækifæri til að kynna sér það efni. Líklega þyrfti ráðstefna af þessu tagi eða vera þriggja daga ráðstefna.

Ráðstefnuslit og lokahóf voru milli 15.00-16:30.