útlit á vefsíðum

Úttekt á íslenskum vefsíðum (Fyrirlesari Ásrún Matthíasdóttir, Lektor/Verkefnisstjóri í Háskólanum í Reykjavík)

Kynning
Úttekt er gerð á 40 íslenskum heimasíðum eftir aðferðafræði Jacobs Nielsens sérfræðings í notendamiaðri hugbúnaðargerð. Mæld er plássnýting og hvort síðurnar séu notendavænar. Niðurstöðurnar eru bornar saman við bandaríska könnun frá árinu 2001.

Ásrún Matthíasdóttir fjallaði um skýrslu sem Ragnheiður Ýr Grétarsdóttir, nemandi í HR vann undir leiðsögn hennar og Mörtu Kristínar Lárusdóttur. Voru heimasíðurnar valdar úr hópi stórra íslenskara fyrirtækja. Einungis voru kannaðar upphafssíður.

Upphafsíðunni var skipt upp í 7 svæði:

1. einkenni fyrirtækis, logo
2. Siglingaleiðir
3. innihald
4. auglýsingar
5. kynning
6. uppfylling
7. ónotað pláss

Eftirfarandi atriði þóttu mikilvæg við mat á síðum, samkvæmt aðferðafræði Jacobs Nielsens.

Hleðslutími minni en 10 sekúndur
Ekki nota ramma
Notandi á að geta breytt stafastærð ef hann kann
Logo efst í vinstra horni
Leit ofarlega með hvítum glugga
Ekki “splass” eða “skvettusíða”
Upplýsingar um fyrirtækið
Hvað er gert við upplýsingar um notenda

Við rannsókn á íslensku síðunum kom m.a. í ljós að:

Logo tekur 7% af plássi síðu
Innihald var minna en 21% af síðu
Ónotað pláss var 39% af síðu
Uppfylling var 11%
Auglýsingar 3%
Siglingaleiðir 12%

Miðað við bandarísku fyrirtækin nýttu þau íslensku síðurnar mun verr. Það varð umræða um það hvort endilega væri betra að nýta plássið mjög vel á síðunum. Mér fannst eins og flestum fyndist betra að hafa ekki of mikið efni á síðunum. Það er einnig mikilvægt að í rannsókninni er verið að skoða fyrirtæki sem vilja koma sem flestum upplýsingum á framfæri fljótt. Þegar við erum að hugsa um kennsluvefi verðum við að hugsa um uppeldisfræðileg atriði fyrir börn og unglinga eins og t.d. hvernig texta börnin lesa best, hvað eiga t.d. línur að vera langar og hvernig útlit höfðar til nemenda okkar. Það væri gaman að fá svipaða rannsókn gerða á skólasíðum. Þegar ég skoða erlendar síður þá eru þær iðulega með mörgum dálkum og miklum texta, en textinn birtist þó í litlum skömmtum. Við á Íslandi eigum alltaf erfiðara með að samsama okkur svona reglum og viljum vera okkar eigin smiðir. Við eigum áreiðanlega heilmikið eftir ólært í þessum efnum.

Fyrir mig var þetta mjög gagnlegur fyrirlestur sem kom inn á ýmiss atriði sem ég hef hugsað mikið um í vetur eftir að ég fór að vinna með vefsíður. Mikilvæg atriði eins og að gera notenda kleift að breyta stafastærð eru til umhugsunar og sjálfsagt að reyna að nýta þá möguleika í forritum. Einnig eiga margir erfitt með að lesa af hvítum grunni og er þá sjálfsagt að gefa kost á að breyta bakgrunnslit.