Markmið með Brúarþarut

Með þessu verkefni eru nemendur að vinna við:

að leysa þrautir sem geta haft fleiri en eina lausn
tjá sig bæði munnlega og í rituðu máli um lausnir sínar
að þjálfa rökhugsun sína
tölvusamskipti
að búa til þrautir fyrir aðra
myndvinnslu

Nemendur glíma hér við eina sameiginlega þraut sem hefur fleiri en eina lausn. Markmiðið er að nemendur uppgötvi og skilji að með skipulögðum vinnubrögðum og kannski svolítilli þrautseigju er hægt að leysa hana. Lausnarferlið er mikilvægt og jafnvel mikilvægara en lausnin sjálf. Nemendur kynnast því að röng svör geta einnig verið lærdómsrík.

Í þessu verkefni er lögð áhersla á að nemendur geti tjáð sig um lausn sína bæði munnlega og skriflega. Í aðalnámskrá í stærðfræði er lögð mikil áhersla á þátt tungumálsins. Þar segir m.a. á bls 7:

"Lögð er áhersla á að hægt sé að þjálfa leikni í að takast á við viðfangsefni þar sem lausnir liggja ekki í augum uppi. Sú leikni er samofin öðrum þáttum. Leit að lausnum krefst bæði hugkvæmni og rökvísi og færni í notkun tungumálsins eykur rökvísi. Saman við þessa þætti fléttast samvinna nemenda og tjáskipti þeirra á milli.

Þjálfun tungumálsins er mikilvægur þáttur í að efla stærðfræðilega hugsun. Læsi á texta og myndræna framsetningu, nákvæm notkun tungumáls og táknmáls og hæfni til munnlegrar og skriflegrar tjáningar og tjáskipta við aðra stuðlar allt að dýpri skilningi á stærðfræðilegum hugtökum og aðferðum."

Verkefnið felst einnig í því að búa til þraut fyrir samstarfsbekkinn. Markmiðið með því er að fá nemendur til sjálfstæðrar sköpunar og að leyfa hugmyndaflugi þeirra sem oft er mjög ríkulegt á þessum tíma að njóta sín. Með því að myndskreyta þrautina eru þau bæði að útskýra þrautina betur fyrir samstarfsbekknum og um leið að móta og tjá hugsanir sínar á myndrænan hátt.

Um þetta er einnig fjallað í aðalnámskrá í stæðrfræði. Þar segir m.a. á bls. 23.

Við lok náms í 4. bekk á nemandi að

- hafa búið til eigin þrautir, t.d. um viðfangsefni daglegs lífs
- geta unnið með öðrum að lausn þrauta, rætt mismunandi
leiðir og skýrt lausnarferli sitt fyrir öðrum
- geta rökstutt niðurstöður sínar, túlkað og sannreynt