Sálfræðingurinn Carl Jung (1923) skilgreindi fjórar víddir persónuleikans en þær byggja á skynjun (sensing), hugsun (thinking), tilfinningum (feeling) og innsæi (intuition).

Skynjun gefur til kynna að eitthvað sé til, hugsunin hvað það er, tilfinningar hvort það er í lagi og innsæi hvaðan það kemur og hvert það fer. Af þessu hafa sprottið líkön um það hvernig menn læra á mismunandi vegu og hvaða mismunandi námsaðferðir henta einstaklingum. Með því að nýta þannig líkön er hægt að meta hvernig einstaklingar læra og hvernig hugsanaferlið hefur áhrif á námsaðferðir þeirra (Silver, Strong &Perini 2000:21-24).
Líkan um námsstíla (learning styles) með hönnun þeirra Silver og Hanson (1998) til grundvallar skiptist í ST-námsmenn (Sensing-Tinking, Mastery Learners), NT-námsmenn (Intuitive Thinking, Understanding Learners), NF-námsmenn (Intuitive –Feeling, Self-Expressive Learners) og SF-námsmenn (Sensing –Feeling, Interpersonal Learners).
ST-námsmenn eru raunsæir, hagsýnir og halda sig við staðreyndir, þeir láta verkin tala, eru stjórnsamir og nákvæmir. Þeir vilja að svör séu annað hvort rétt eða röng og þeim líkar samkeppni. Einkunnir, umbun og verðlaun og viðurkenningar fyrir árangur á vel við þá.
NT-námsmenn eru sjálfstæðir, þolinmóðir, leita að samhengi í viðfangsefnum, þeim líkar vel við kenningar og kryfja vandamál til mergjar. Þeir leita að orsök og afleiðingu, vilja sannleikann og rökstuðning en þurfa jafnframt tíma til að vinna verkin.
NF-námsmenn eru forvitnir, hafa innsæi og gott ímyndunarafl. Þeir eru stöðugt að leita að nýjum lausnum, eiga frumkvæði, leysa úr klemmum og vilja gjarnan opnar spurningar. Best vinna þeir eftir sveigjanlegu kerfi og eigin áhuga sem er hvatinn í námi. Þeir byrja gjarnan á fleiru en þeir áorka.
SF-námsmenn eru vingjarnlegir, félagslyndir og næmir á tilfinningar bæði eigin og annarra. Skólinn á að endurspegla lífið sjálft og námið á að tengjast persónulegri og tilfinningalegri reynslu. Samvinna á frekar við þá en samkeppni og þeir hafa áhuga á öðru fólki og líkar vel að skiptast á skoðunum og hugmyndum.
Eins og með fjölgreindakenninguna þarf að forðast þau mistök að raða nemendum eftir ákveðna flokkum því það er mikil einföldun. Þó að einstaklingar geti haft ríkjandi stíl, nota þeir alla þessa fjóra námstíla í lífinu allt eftir aðstæðum og samhengi (Silver, Strong & Perinini 2000: 24-27).

Eftir þessum kenningum ákvað ég að búa til eyðublað til að afla upplýsinga um nemendur þannig að hægt sé að meta hvaða námstílar henta hverjum og einum. Ég miða við unglinga (8.9. og 10.b), hafðu samband í tölvupósti gve@ismennt.is ef þú vilt vita meira.

Heimild: Silver, Harvey F., Richard W. Strong og Mattew J. Perini. 2000. So Each May Learn. Integrating Learning Styles & Multiple Intelligences
ASCD, Alexandria