Á upplýsingaöld er nauðsynlegt að allir þegnar þjóðfélags hafi kost á að nýta sér möguleika upplýsingatækninnar. Undanfarin ár hefur Internetið tekið stór skref í þá átt að verða einn helsti upplýsingamiðillinn. Talið er að notendur þess séu um 30-40 milljónir (InterNic febr. 1998).

Sú kynslóð sem elst upp í dag er vön því að tölva sé hluti af tækjaflóði heimilanna. Þessi kynslóð telur lyklaborðið vera eðlilega framlengingu fingra og að félagsleg samskipti við aðra geti auðveldlega farið fram á tölvuskjánum. Internetið er að verða sjálfsagður og eðlilegur hluti af daglegu lífi manneskjunnar og verður því að koma til móts við það í grunnskólum landsins.

Íslensk stjórnvöld hafa mótað stefnu (Menntamálaráðuneytið 1996) sem tekur til upplýsingatækni og Internetsins. Hafa stjórnvöld sett sér það takmark að koma Íslendingum í fremstu röð þjóða sem notfæra sér kosti upplýsingatækninnar. Skólar og kennarar eru að koma til móts við nemendur sína og gera þá hæfari til að nýta sér þá tækni sem er í boði. Hins vegar tekur allt þetta sinn tíma. Haustið 1998 tekur gildi ný aðalnámskrá og er kynnt nýtt námssvið sem er upplýsinga- og tæknimennt (Menntamálaráðuneytið 1997). Þar má sjá að verið er að mæta þeirri þróun sem á sér stað í íslensku og alþjóðlegu þjóðfélagi.  Upplýsingatækni á að verða sjálfsagður hluti af daglegu lífi nemenda og þeir eiga að vera færir um að nýta sér kosti þessarar nýju tækni.

Hvernig er Internetið notað í grunnskólum landsins í dag? Hverjir eru kostir þessa nýja miðils fyrir skólastarf? Er eitthvað í eðli Internetsins sem dregur úr því að það sé notað í skólum? Hvernig má yfirvinna helstu hindranir sem kennarar mæta? Þetta voru þær spurningar sem lagt var af stað með í ritgerðinni og reynt að leita svara við þeim. Í því skyni var sendur tölvupóstur til 18 kennara, sem upplýsingar fengust um frá Íslenska menntanetinu að væru að nota Internetið með nemendum sínum. Voru þeir beðnir um að svara nokkrum spurningum (sjá viðauka) sem tengdust þeirri notkun. Tíu svör bárust frá kennurum og eru svör þeirra nefnd í sambandi við kafla 3.-5. Kennararnir gáfu dæmi um verkefni sem þeir hafa notað í skólastarfi og er þau að finna í 5.kafla.

Kennarar hérlendis hafa kvartað um að þá skorti hugmyndir um nýtingu og þess vegna mun höfundur lýsa nokkrum góðum verkefnum og dæmum um notkun Internetsins í skólastarfi, bæði frá öðrum og höfundi sjálfum.

Í takt við nýja tíma er ritgerðin birt á vefnum og með þeim hætti er verið að nýta sér þá möguleika sem Internetið býður upp á. Með því er lagt til aðgengilegt efni sem aðrir geta nýtt sér og einnig vonast höfundur til þess að þessi ritgerð geti orðið kveikja að fleiri verkefnum á þessu sviði.