Hér er að finna skilgreiningar á þjónustu Internetsins. Bæði eru hér skilgreiningar sem má finna á öðrum vefslóðum og aðrar sem ég hef endurbætt og aukið við.
Spurningar sem sendar voru til kennara og þeir beðnir um að svara.
Veraldarvefurinn (World Wide Web) er einn hluti Internetsins og er ekki eins og margir halda Internetið sjálft. Á veraldarvefnum er að finna ógrynni upplýsinga á margmiðlunarformi þar sem texti, kyrrmyndir, hreyfimyndir og hljóð eru notuð til að mynda eina heild sem hægt er að skoða með sérstökum hugbúnaði (vefskoðara). Þetta er gert mögulegt með þéttofnu neti miðlara um allan heim. (Íslenska menntanetið 1998)
Tölvupóstur (Electronic mail) er þjónusta sem er kannski sú sem er mest notuð á Internetinu. Tölvupóstur gerir notanda kleift að senda póst til annars notanda með ógnarhraða yfir samtengd tölvunet Internetsins. Fjarlægðin skiptir ekki máli og berst póstur viðtakanda oftast innan nokkurra mínútna.
Spjallrásir (Internet Relay Chat) er þjónusta sem hefur farið vaxandi undanfarin ár. Á spjallrásir er hægt að fara með margskonar hugbúnaði, allt frá einföldum skjásambandsforritum til margslunginna þrívíddarforrita, og þar er hægt að komast í kynni við fólk alls staðar utan að úr heiminum. Spjallið á sér stað í rauntíma, þ.e.a.s. viðkomandi er fyrir framan tölvu sína og spjallar við aðra um leið og hann fær svör frá þeim.
Tölvuráðstefnur eða fréttakerfi (Newsgroups) er opinn vettvangur þar sem hægt er að skiptast á upplýsingum og skoðunum. Öllu efni þar er skipt í efnisflokka og skipta þeir þúsundum. Efnið liggur ekki á einum ákveðnum stað heldur flæðir það um Internetið. Það er svo hver og einn notandi sem ræður hvaða efnisflokka hann vill skoða og senda bréf inn á.
Skráarflutningur (File Transfer Protocol) er flutningsmáti sem er notaður til að flytja skrár frá einni tölvu tengdri Internetinu til annarrar.
Vefskoðari er hugbúnaður sem gerir notanda kleift að leita að upplýsingum á tölvuneti, ná í þær upplýsingar og skoða á auðveldan og myndrænan hátt. Vinsælustu vefskoðararnir í dag eru Netscape Navigator og Internet Explorer.
Krækja (Hyperlink) er kóði í HTML sem lætur notanda hoppa á milli vefslóða. Á þessari vefsíðu má finna margar krækjur sem vísa notanda yfir á aðrar síður.
Trúss (eða viðhengi) er fylgiskjal með tölvupósti. Hægt er að senda ýmsar skrár, svo sem Word-skjöl, með tölvupósti og er þá talað um að binda trúss við tölvupóstinn.
Netheimur (Cyberspace) er hugtak sem lýsir þeim ímyndaða heimi sem notendur eru í þegar þeir flakka á Internetinu.
Hvernig vinnur þú með Internetið í skólanum? Hvernig vinna nemendur með Internetið eða á því? Hversu gamlir eru nemendurnir sem vinna með Internetið?
Er Internetið ein námsgrein? Ef svo er, gætirðu lýst því fyrir mér hvernig þú byggir upp kennsluna?
Notarðu Internetið sem hluta af kennslu og þá sem kennslugagn?
Er eitthvað í eðli Internetsins sem hindrar að þú viljir láta nemendur vinna á Internetinu eða sem hindrar að nemendur sjálfir vinni á Internetinu? [Þá á ég ekki við tækjabúnað eða tengingarmál]
Telur þú að samþætting Internetsins við aðrar námsgreinar sé möguleg? Hvernig?
