Heilsufar

Heilbrigðisvandamál eru mörg í Namibíu. Algengt er að börn þjáist af niðurgangi og sýkingu í öndunarfærum. Ungbarnadauði er hár miðað við það sem gerist á Vesturlöndum og sömu sögu er að segja af dauða kvenna vegna barnsfæðinga, þótt tölurnar séu lægri en í sumum nágrannaríkjum. Lungnabólga og berklar eru einnig algengir sjúkdómar og malaría er vandamál á ákveðnum svæðum. Ein alvarlegasta ógnin er þó alnæmi. Frá því fyrsta tilfellið greindist árið 1986 hefur sjúkdómurinn breiðst út á óhugnalegum hraða. Í nóvember 1998 mat Alþjóðaheilbrigðisstofnunin að um 20% íbúa á aldrinum 15-49 ára væru sýktir af alnæmisveirunni og má telja líklegt að hlutfallið hafi hækkað síðan. Yfirvöld hafa lýst yfir að útbreiðsla alnæmis sé neyðarástand á þjóðarvísu og þurfi að takast á við vandamálið í samræmi við það. Ekkert stefni þróun Namibíu í meiri hættu en áframhaldandi útbreiðsla sjúkdómsins.

Eins og í menntamálum, er það yfirlýst stefna stjórnvalda að leggja áherslu á að jafna aðstöðumun þeirra sem búa í þéttbýli og dreifbýli með því að beina auknu fjármagni til heilsugæslu í hinum dreifðu byggðum. Um 11% af fjárlögum ríkisins renna til heilbrigðismála og hefur aukin áhersla verið lögð á fyrirbyggjandi aðgerðir. En aðgengi fólks að heilbrigðisþjónustu er mjög mismunandi eftir búsetu og efnahag. Almannatryggingakerfi á heilbrigðissviði er ekki til staðar. Fólk verður sjálft að kaupa sér sjúkratryggingar og er það ekki á allra færi..
(© ÞSSÍ)

© JÁÞ

 

Lífslíkur 56 ár.

Ungbarnadauði 58/1.000.

Dauði við barnsfarir 103/100.000.

Vannæring barna 15%

Aðgangur að hreinu vatni
65% (dreifbýli), 100% (þéttbýli)
(© ÞSSÍ)

Forsíða --- Efst á síðu --- Verkefnaskil --- Nemendasíða --- Umræður
© JÁÞ maí 2001