Margar ógnvekjandi munnmælasögur lifa meðal þjóðflokkanna sem byggja landið fyrirofan eyðimörkina um örlög skipbrotsmanna. Ein gömul saga segir frá Hererohöfðingja sem hraktist niður að strönd ásamt liðsmönnum sínum út af erjum við nágranna. Þar rákust þeir á tvær undarlega útlítandi verur og voru framan af ekki vissir um hvort þetta væru dýr eða menn. Það var ekki fyrr en þeir sáu að verunar gengu á tveimur fótum að þeir fullvissuðu sig um að þarna væru menn á ferð. Í nágrenninu var strandað skip og skipbrotsmennirnir tveir nær dauða en lifi af þorsta og hungri. Annar mannanna lést fljótlega en hinum gáfu Hereromennirnir einn uxa og skildu hann síðan eftir til að mæta örlögum sínum.

Fram á síðari ár var nánast útilokað að nokkur kæmist af eftir strand við Helgrindarströnd og enn stendur sjófarendum mikil ógn af henni.
(© ÞSSÍ)