Jafnréttismál
© JÁÞ
Konur eiga undir högg að sækja í Namibíu eins og víðar. Áður hindruðu lög að þær gætu tekið þátt í efnahagslífi á jafnréttisgrundvelli. Þær skorti lagalegan rétt á við karlmenn til að komast yfir eignir, höfðu lítinn aðgang að fjármagni og voru hindraðar í þátttöku í ákveðnum atvinnugreinum. Margvíslegar hömlur voru lagðar á frelsi kvenna að þessu leyti. Þannig eru aðeins örfá ár síðan giftar konur öðluðust fjárræði en áður urðu þær að fá samþykki eiginmanns síns fyrir því til dæmis að eiga bankaviðskipti eða skrifa undir samning. Venjur þjóðflokka eru einnig sjaldan hliðhollar konum í efnahagslegu tilliti, þær eru til dæmis oft lakara settar en karlar þegar kemur að erfðum. Almennt eru laun kvenna lægri en laun karla og þær búa einnig við meira atvinnuleysi en þeir. Af þessum sökum falla mun fleiri konur en karlar í hóp þeirra fátækustu. Þær konur sem reka heimili án eiginmanns sem leggur fé til fjölskyldunnar eru í mörgum tilvikum sérstaklega illa staddar, en það á við um nær þriðjung heimila í landinu.

Stjórnarskrá Namibíu kveður á um jafnrétti kvenna og karla. Hún mælir einnig fyrir um jákvæða mismunun fyrir alla þá sem áður máttu búa við ójafnrétti, hvort sem var vegna kynþáttar eða kyns. Orð eru til alls fyrst, en mikið verk er þó óunnið við að knýja fram raunverulegar breytingar í jafnréttisátt.
(© ÞSSÍ)
Forsíða --- Efst á síðu --- Verkefnaskil --- Nemendasíða --- Umræður
© JÁÞ maí 2001