Namibía hlaut sjálfstæði árið 1990, en áður var svæðið undir stjórn Suður-Afríku. Landið er staðsett í sunnanverðri Afríku, á vesturströnd álfunnar, og á landamæri að fjórum ríkjum. Suður-Afríka liggur að landinu í suðri, þá Botswana í austri og í norðri liggja landamæri að Zambíu og Angóla. Nambía er stórt land, meira en 800 þúsund km2, en mjög strjábýlt. Íbúafjöldi á hvern ferkílómetra er aðeins 1,7 en til samanburðar má nefna að á Íslandi, sem þó er með strjábýlli löndum, búa að meðaltali 2,6 íbúar á hvern ferkílómetra.

Loftslag í Namibíu einkennist öðru fremur af lítilli og óútreiknanlegri úrkomu. Ekki bætir úr skák að uppgufun er mikil og er svæðið það þurrasta í Afríku á eftir Sahara. Suðurhluti landsins er afar þurr og þar ná hinir víðfemu Kalahari sandar inn í landið, en þeir breiða sig frá Suður-Afríku og norður fyrir Botswana. Um miðbik landsins eru kjarri vaxnar hásléttur en í norðausturhlutanum er hitabeltisloftslag og gróðursæld meiri. Nafn sitt fær landið eftir Namib eyðimörkinni sem liggur meðfram endilangri strandlengjunni í vestri og er hún talin elsta eyðimörk heims, um 80 milljón ára gömul. Víðast hvar í landinu eru a.m.k. 300 sólskinsdagar á ári en mestar líkur á rigningu eru á tímabilinu nóvember fram í apríl sem er sumar í Namibíu.

Þó hið þurra loftslag setji plöntu- og dýralífi nokkrar skorður er líffræðilegur fjölbreytileiki mikill og sérstaklega er fjöldi sjaldgæfra tegunda athygli verður. Landið er einnig auðugt af náttúruauðlindum. Miklar demantanámur eru í suðvesturhluta landsins, í miðhlutanum finnast til dæmis gull, úraníum og marmari og á hásléttu norðausturhlutans er að finna kopar og aðra málma. Namibía hefur einnig yfir gjöfulum fiskimiðum að ráða.

Fólksfjöldinn í Namibíu var metinn 1,73 milljónir árið 1998. Fólksfjölgun er hröð, eða 3,1% á ári og um 55% íbúanna eru undir tvítugu. Um þriðjungur Namibíumanna býr í borgum og bæjum en tveir þriðju hlutar búa í sveit. Þéttbýlast er í norðurhéruðum landsins og á svæðinu í kringum höfuðborgina Windhoek. Íbúar í Windhoek voru um 190 þúsund árið 1998 en aðrir stórir bæir eru Ondangwa (60 þúsund), Oshakati (50 þúsund), báðir í norðri, og Walvis Bay (40 þúsund) við ströndina.

Í Namibíu býr fólk af fjölmörgum þjóðflokkum. Ovamboþjóðflokkurinn er langfjölmennastur, eða um helmingur þjóðarinnar. Aðrir þjóðflokkar eru til dæmis Kavango, Herero, Damara, Nama og San. Um 5% eru af blönduðum uppruna og hvítir íbúar eru um 5%. Flestir þeirra eru af þýskum uppruna en einnig er nokkuð um Búa frá Suður-Afríku.

Enska er opinbert tungumál í Namibíu síðan 1991 og er notað í viðskiptum en þjóðflokkarnir eiga yfirleitt sitt eigið tungumál. Flestir tala oshivambo eða skyldar málýskur en samtals eiga Namibíumenn 28 tungumál. Aðeins 1-2% íbúanna hafa ensku að móðurmáli og einungis tíundi hluti talar málið vel. Hlutfall þeirra sem tala ensku fer þó vaxandi. Um 10% hafa hins vegar afrikaans að móðurmáli, m.a. flestir blandaðra og meirihluti hvítra, en það er tungumál Búa og skylt hollensku.
(© ÞSSÍ)

Forsíða --- Efst á síðu --- Verkefnaskil --- Nemendasíða --- Umræður
----------------------------------------------------------------

Land og þjóð

Stærð: 824.269 km2
Mannfjöldi: 1,73 milljónir (1998)
Höfuðborg: Windhoek
Meðalhiti: Windhoek 17-19°C (janúar), 6-20°C (júní)
Hæsta fjall: Brandberg (2.606 metrar yfir sjávarmáli)
Stærstu ár: Okavango, Oranje, Kunene og Zambezi
Tungumál: Enska (opinbert), oshivambo, afrikaans og fleiri
Helstu þjóðflokkar: Ovambo (50%), Kavango (8%), Herero (8%), Damara (7%), Nama (5%), blandaðir (5%), hvítir (5%), Caprivi (4%), San (3%), aðrir (5%)
Gjaldmiðill: Namibískur dollari (N$) = 11,50 ísl. kr. Fylgir suður-afrísku randi
(© ÞSSÍ)

 

© JÁÞ maí 2001