Plantan Welwitschia er líklega þekktasta plöntutegund Namibíu. Hún vex nær eingöngu á þröngu belti í Namib eyðimörkinni. Þessi sérkennilega eyðimerkurplanta, sem raunar telst dvergvaxin trjátegund, er ævaforn tegund og hver einstök planta verður einnig með afbrigðum langlíf. Hún er því stundum kölluð lifandi steingervingur. Algengt er að plantan verði 500-1.000 ára gömul og fundist hafa einstakar plöntur sem náð hafa 2.000 ára aldri. Welwitschia hefur aðeins tvö laufblöð sem trosna og dökkna eftir því sem plantan eldist. Laufblöðin geta orðið allt að þriggja metra löng og liggja í flækju á jörðinni í skjóli fyrir eyðimerkurvindinum. Ólíkt flestum öðrum eyðimerkurplöntum, sem hafa lítið yfirborð laufblaða til að takmarka vatnstap, hafa laufblöð Welwitchia plöntunnar mikið yfirborð og á þeim eru milljónir loftauga sem drekka í sig raka úr þokunni sem liggur yfir eyðimörkinni um 200 daga ársins. Þokan stafar af nálægð Benguela hafstraumsins en hann kemur frá Suðurskautsvæðinu og fer norður með strönd Namibíu. Welwitschia er þannig dæmi um tegund sem hefur lagað sig að ákaflega sérstökum náttúruskilyrðum og hún á engan sinn líka. Tegundin er friðuð og liggja þung viðurlög við að skemma hana eða fjarlægja frá vaxtarstað.
(© ÞSSÍ)