Stefna stjórnvalda hefur skilað um 30% aukningu nemenda í skólana og um 90% barna á skólaskyldualdri eru í skóla. Brottfallstölur eru þó enn háar og minna en fjórðungur nemenda fer í framhaldsskóla að loknum grunnskóla. Ólæsi er útbreitt en nákvæmar tölur eru á reiki. Ólæsi meðal fullorðinna er metið allt frá 20% og upp í 40% eða jafnvel hærra. Talsvert mikill munur er milli þjóðflokka hvað varðar hlutfall ólæsra.

Breytingar hafa einnig orðið á innra skólastarfi og ber þar hæst þá ákvörðun að kennsla skuli fara fram á ensku, en áður var kennt á afrikaans sem eins og áður segir er tungumál Búa. Það hefur þó valdið erfiðleikum þar sem fæstir kennarar hafa nægilega gott vald á ensku til að kenna á því tungumáli. Í framhaldsskólum var suður-afrísk námskrá felld úr gildi og önnur námskrá innleidd sem byggir á alþjóðlegum staðli (IGCSE). Ekki hefur þó verið þróað nægilegt námsefni með hinni nýju námskrá og virðist breytingin því hafa haft áhrif til hins verra á námsárangur nemenda. Þannig náðu aðeins 5% þeirra 11.000 nemenda sem þreyttu lokaprófin árið 1995 nógu góðum árangri til að geta sótt um nám á háskólastigi.
(©ÞSSÍ)