Nám og kennsla á Netinu

Umsjón: Salvör Gissurardóttir

Skilasíða Jóhönnu Á. Þorvaldsdóttur

Námið á önninni hef ég stundað frá Evrópu, Ameríku og Afríku. Ég byrjaði á Íslandi í staðbundnu lotunni í janúar, var síðan í 6 vikur í háskóla í Washington DC og að lokum í Walvis Bay í Namibíu þar sem ég bý. Ef þetta er ekki að stunda fjarnám þá veit ég ekki í hverju það felst.

Að fara á milli heimsálfa og þurfa að aðlagast með tölvuna sína hverjum stað hefur mér fundist ákveðinn lærdómur. Ég var tengd inn á háskólasvæðið í Gallaudet í Washington DC meðan ég dvaldi þar og sendi allt í gegnum kerfi skólans. Í Afríku hefur allt gengið að óskum með samskiptin þar til fyrir tíu dögum þá gerðist eitthvað með vélina mína sem tæknimönnum hefur ekki tekist að finna út hvað er. Þetta hefur þýtt að ég flutti öll verkefnin mín yfir á tölvu mannsins míns og er að senda ykkur þaðan verkefnaskilin. Mér tókst ekki að flytja nema tvö táknmálstákn sem búið var að vinna fyrir mig á Íslandi yfir í þessa vél og sendi sýnishorn af þeim.

Námið hefur verið lærdómsríkt og skapandi. Það sem hefur haft mest áhrif á mig eru allir þeir möguleikar sem ég sé með tölvunotkun fyrir hina sjónrænu kennslu sem mínir heyrnarlausu nemendur þurfa. Að eiga þann möguleika að setja táknmál inn í námsefni er stórkostlegt, auðveldar kennslu og sparar tíma. Nemendur geta stjórnað ferlinu, sem þeir eru að fara í gegnum, meira en áður og allt verður sýnilegra. Kennarar hafa þarna tæki sem þeir geta nýtt til að verða við óskum hvers og eins og dýpkað verkefni með þeim sem eru tilbúnir til þess og fara hægar með aðra. Mögulegt er að víkka sjóndeildarhring nemenda sem skilja erlend tungumál með því að gefa þeim tækifæri til að skoða verkefni og fá upplýsingar frá mismunandi stöðum í heiminum. Kennari þarf að vera mjög meðvitaður um hvað hann er að bjóða nemendum að skoða á vefnum og hjálpa þeim að vera gagnrýnum á það sem þau eru að skoða og vinna með.

Á haustönn sendi ég inn heimasíðu unna í FrontPage en bjó til nýja í Dreamweaver fyrir þessa önn.

Vefleiðangrarnir fyrir skólastarf og félagsstarf eru unnir til notkunar fyrir mína heyrnarlausu nemendur. Ég ákvað að setja ekki venjulegar myndir á vefleiðangrana, bíð eftir að geta látið vinna fyrir mig táknmál til að setja þarna inn.

Í verkefninu Kennsluefni á vef sendi ég inn síður sem ég er að gera tilraunir með. Efnið er ætlað byrjendum og ég er að setja táknmál inn á þær. Ég sendi tvö táknuð orð en ætla einnig hafa ramma fyrir þau stöfuð.Síðan ætla ég að hafa eyðu fyrir texta sem unninn er með nemendum í kennslustund hverju sinni.

Ég tók mikinn þátt í umræðum um verkfæri, sendi inn spurningar og fékk góðar leiðbeiningar til baka. Sendi inn mörg innlegg í umræður um vefsíður og vefleiðangra sem eru á "webboard" .
Ég fylgdist með vinnu kennara með nemendur frá leikskóla og upp í háskóla í Gallaudet sem er skólasvæði heyrnarlausra í Washington DC í Bandaríkjunum. Með yngsta stig grunnskóla var unnið með námsefnið þannig að alltaf var sett kynning á táknmáli inn á skjáinn ef verið var að leggja inn nýtt námsefni og ný orð þá bæði stöfuð og táknuð. Síðan var myndun setninga unnin í kennslutímum og sett inn í verkefnið þegar nemendur og kennarar voru orðnir sáttir við niðurstöðuna.
Tíu til tólf ára nemendur unnu með kennurum við að útbúa til hinar ýmsu kynningar á vef og fengu þá sjálfir að taka myndir á upptökuvélar og klippa þær til og textasetja verkefnið undir leiðsögn.
Nemendur í framhalds- og háskólanum kynntu tölvuunnin verkefni. Kennarar og nemendur horfðu gagnrýnin á það sem fyrir var lagt og ræddu eftir hverja kynningu hvað var gott og hvað mátti betur fara. Tilbrigðin í útfærslu voru mörg og greinilegt að margir nemendur fengu útrás fyrir að láta sem mest af tækniatriðum koma fyrir á hverri síðu. Það var tekið fyrir og rætt mjög faglega hvað ætti erindi á síðurnar.

Ég þarfagreindi vef Borgarholtsskóla ásamt Hafdísi Ólafsdóttur og Þóru Björk Guðmundsdóttur.Við Kristín Einarsdóttir skoðuðum vefi saman í staðbundnu lotunni í maí en sendum ekki á "webboard" skriflega úttekt á þeim.
Er ég dvaldi í Gallaudet þá skoðaði ég Web Evaluation Form, sem er form sem notað er til að rannsaka vefi, hvort þeir henti börnum í KidsWorld Deaf Net, KWDN. Phil Mackall er yfirmaður verkefnisins og er með fólk í vinnu við úttektir á efni sem sett er á Kids World Deaf Netið. Það voru 21 að skoða vefina, allt fagfólk. Ég "skannaði" (myndlas?) formið sem notað er við úttektina og sendi það hér með.

Ég fékk leyfi til að vinna námsefni um Namibíu á vef. Allar ljósmyndir eru unnar af mér og teknar á stafræna myndavél. Eitt kort af Namibíu er í námsefninu sem ég "skannaði" (myndlas?). Ég var búin að setja inn í námsefnið umræðukerfið Coolboard fyrir nemendaumræður. Coolboard valdi ég eftir mikla yfirlegu og ástæðan var sú að mér fannst það einfalt í uppsetningu, hraðvirkt og það er hægt að læsa hluta af því eða öllu. En hvað gerðist? Ég fékk tilkynningu fyrir tíu dögum um að það yrði lagt niður og ekkert við því að gera. Þetta er það sem vofir yfir með þessar ókeypis rásir sem verið er að bjóða upp á. Þessi síða í námsefninu bíður því eftir að verða tengd þegar þar að kemur. Sama er að segja um síðuna sem heitir verkefnaskil, þar þurfa nemendur lykilorð til að setja verkefni í hólfið sitt.

Ég bjó til eina myndasíðu í Dreamveaver.

Ég tók þátt í UT2001 umræðunni þó að ég gæti ekki mætt á ráðstefnuna. Las það sem sett var á Netið, m.a. um eWizards verkefnið. Í umræðuna um hugsmíðahyggju sendi ég innlegg og eina fyrirspurn til Þuríðar en fékk ekki viðbrögð.

Eftir prófun á hinum ýmsu leitarvélum og lestur bókarinnar Seaching the Internet eftir Brian Cooper er mín niðurstaða að Google leitarvélin komi best út. Hún er hraðvirk og einföld og til viðbótar við kostina sem fyrir voru er hún komin á íslensku.

Ég eyddi ómældum tíma í að finna út besta umræðukerfið og er þegar hér að ofan búin að gera grein fyrir valinu. Ég koðaði allar rásirnar sem Salvör benti á, las fróðleikinn sem Sigurður Fjalar sendi okkur og með Kristínu Einarsdóttur fór ég inn á umræðukerfin hans og sendi línu . Ég prófaði að heimsækja Kirsten á hennar spjallrás en það gekk ekki, skoðaði Skólatorgið og það sem Grandaskóli er með og fleira.

Ég fylgdist með nemendum bæði í framhaldsskólanum og háskólanum í Gallaudet nota umræðukerfi. Einnig var ég í MSSD framhaldsskólanum hjá Mary Ellsworth í Senior Team Eart System Sience Class. NASA styrkti þetta verkefni í upphafi en ekki lengur. Núna vinna saman MSSD og skólar í Californiu og Indiana og eru með sameiginlega fjarkennslu á Netinu. Ég hef fylgst með "Videoconference" þar sem nemendur frá öllum skólunum tóku þátt og voru með verkefni. Kennarar voru til hlés, ekki í mynd, nemendur stjórnuðu og gátu þarna talað saman á táknmáli og gekk vel. Eins og nafnið bendir til er þarna verið að skoða jörðina utan úr geimnum. Unnið er með myndir sem teknar eru þaðan og sýna hitahjúp jarðar og margt fleira. Nemendur skilgreina það sem þeir sjá með því að skoða litina sem birtast. Þeir eru æfðir í að gagnrýna það efni sem þeir eru að skoða

Ég sendi inn á EUN vefinn frumframlög og viðbrögð bæði á Safe - discussion og eWizards og einnig mörg á "webboard" Vef íslenska menntanetsins:

Meðan ég dvaldi í Gallaudet háskóla sendi ég þrjá pistla inn á webboard um það sem ég var að upplifa þar.

Í Gallaudet háskóla fékk ég að vera með á umræðufundi þar sem var samankomið fólk bæði heyrandi og heyrnarlaust sem er að kenna hinar ýmsu greinar í fjarkennslu í allar áttir. Sá sem stýrði umræðunni heitir Martin Noretsky, og þau kölluðu þetta: GDOC (Gallaudet Dynamic Online Collaboration) Users Unite Group Meeting. Þarna fór fram mjög skemmtileg umræða um tæknileg atriði og einnig var rætt um þátt kennslufræðinnar. Þeim bar saman um að nemendur væru ekki nógu gagnrýnir á það efni sem þeir væru að skoða og að áfram yrði þörf fyrir kennara til að leiða. Þarna er samt verið að tala um háskólastig.
Einn kennarinn, sem kennir fjarkennslunemendum á fyrstu önn, tók saman að gamni sínu, á hvaða tíma nemendur skiluðu verkefnum og niðurstaðan var sú að yfir helmingur nemenda skila verkefnum á tímabilinu ellefu að kvöldi til fjögur að nóttu.

Þarna í háskólanum sá ég mjög vel útbúnar tölvustofur fyrir heyrnarlausa. Tölvurnar liggja ofan í borðunum þannig að nemendur geta allir haft augnsamband við kennarann og notað hendurnar til að tjá sig. Einnig voru notaðar snertitöflur (SmartBoard) á öllum skólastigum.

Eins og ég sagði í upphafi þá hefur námið við KHÍ í Tölvu - og upplýsingatækni verið lærdómsríkt og skapandi. Það ásamt dvölinni við Gallaudet háskóla hefur opnað alveg nýja sýn á möguleika í kennslu heyrnarlausra.

Bestu kveðjur frá Namibíu og þakkir fyrir önnina.
Jóhanna Á. Þorvaldsdóttir

© JÁÞ 24 maí 2001