Kynning

Sorg hendir okkur flest á lífsleiðinni og þarf ekki eingöngu að vera tengd missi við andlát heldur getur missir einnig tengst alvarlegum veikindum, röskun á fjölskyldutengslum, fötlun o.s.frv. Sjaldan, ef nokkurn tímann, erum við tilbúin að taka við sorginni, sem birtist flestum okkar að óvörum.

Lítið hefur verið fjallað um sorg í skólakerfinu en sem betur fer er farið að leggja meiri áherslu á þennan þátt í námi og farið er að leggja drög að því hvernig skólar, á markvissan hátt, geti brugðist við þegar nemandi deyr, veikist eða slasast alvarlega og þegar nemandi missir ástvin. Í nútímasamfélagi lifum við í mikilli fjarlægð við dauðann, ólíkt því sem áður var. Það hefur valdið því að börn og unglingar alast ekki upp við að dauðinn er eðlilegur hluti lífsins og sorgin og sárar tilfinningar hennar eru heilbrigð viðbrögð við sárum missi.

Þessi vefleiðangur á að vekja ykkur til umhugsunar um sorg og sorgarferli, við hverju megi búast hjá einstaklingi sem hefur misst og hvernig megi bæta samfélag okkar með það í huga að styðja þá sem eiga í erfiðleikum eftir missi.