Bréf til þátttakenda:

Kynningarbréf

Kennaraháskóli Íslands
Endurmenntunarnámskeið 1996

Reykjavík, 28. júní 1996


Ágæti kennari,

Við viljum með þessu bréfi bjóða þig velkominn á endurmenntunarnámskeið
um tölvur, upplýsingatækni og skólastarf sem haldið verður 20 -23 ágúst.

Á námskeiðinu verður m.a. fjallað um notkun tölvubúnaðar við ýmiss konar
aðstæður í skólum.  Þá verður fjallað um hlutverk kennarans í ljósi
breyttra aðstæðna og þekkingar nemenda.  Rætt verður um stöðu
upplýsingatækninnar í skólum og hvernig megi nýta hana til framþróunar í
skólastarfi.

Unnið verður að áætlun um þróun upplýsingatækni í skólum  þátttakenda og
hugað  að því á hvern hátt sú áætlun tengist skólanámskrá og almennri
stefnumótun  skóla.   Á námskeiðinu verða kynntir þeir möguleikar sem
bjóðast í kennslu og miðlun með nýrri tækni.

Námskeiðið fer fram í fyrirlestrum, umræðufundum og verklegum tímum í
tölvuveri, einnig verða nýttir annars konar kennslumiðlar, svo sem
vefsíður og tölvupóstur. Með þessu bréfi fylgir dagskrá námskeiðsins. 

Mikil áhersla verður lögð á umræður og sjálfstæða vinnu þátttakenda á
þessu námskeiði.  Við viljum því hvetja þig til að kynna þér stöðu
upplýsingatækni í íslensku skólastarfi áður en námskeiðið hefst. Með
þessu bréfi fylgir bókin     "Í krafti upplýsinga" sem
menntamálaráðuneytið gaf nýlega út.  Einnig fylgir með listi yfir
greinar um upplýsingatækni og tölvur í skólastarfi sem hafa birst nýlega
í Íslenskum menntamálum.  Eftir föngum munum við miðla til þín
upplýsingum og gögnum gegnum veraldarvefinn.  Við munum útbúa sérstaka
vefsíðu fyrir þetta námskeið, slóð að þeirri síðu verður:
http://rvik.ismennt.is/~salvor/tusk.htm og verður hún komin upp fyrir
15. ágúst.

Við hlökkum til að starfa með þér og vonum að þetta námskeið verði
vettvangur fyrir og uppspretta að nýsköpun á þessu sviði í þínum
skóla og öðrum grunnskólum.  Við vonum að það samstarf sem hefst á
námskeiðinu í ágúst haldi áfram á vetri komanda.


                                Með kærri kveðju,

                                Karl Jeppesen (kjepp@ismennt.is)
                                Salvör Gissurardóttir (salvor@ismennt.is)




Dagskrá námskeiðs

Tölvur, upplýsingatækni og skólastarf

20. ágúst       Hið stafræna samfélag
                Hvað er upplýsingatækni?
                Veraldarvefurinn - öflun og framsetning upplýsinga
                Tölvubúnaður við ýmiss konar aðstæður í skólum
                Hlutverk kennarans í breyttu umhverfi



21. ágúst       Staða upplýsingatækni í skólum
		Margmiðlunarefni - kynning og skoðun
                Skólanámskrár og upplýsingatæni
                Sjálfstæð vinna: Vefsíðugerð, skoðun og mat á
		kennsluforritum

22. ágúst       Kennslufræðikenningar og upplýsingatækni
                Gerð áætlunar um þróun upplýsingatækni í
		skólum þátttakenda. (Þátttakendum skipt eftir
		staðsetningu og stærð skóla)
                Tæknin - hvað er að gerast? Kynning á nýjungum


23. ágúst       Áætlunargerð frh.
                Kynning hópa og samantekt á niðurstöðum áætlunargerðar

Kennsla hefst kl. 9:00 alla dagana og lýkur um kl. 16:00 en þó eiga
þátttakendur þess kost að vinna lengur í tölvustofu skólans til nánari
athugunar á því sem námskeiðið fjallar um.

Umsjónarmenn námskeiðsins áskilja sér rétt til fyrirvaralausra breytinga á
dagskrá námskeiðsins.