Upphaf þéttbýlis

Meitillinn

Útgerðin

Höfnin

Verslun

Samgöngur

Skólamál

Húsbyggingar

Um vefinn

Í Aðalnámskrá grunnskóla segir eftirfarandi:

„Markmið samfélagsgreina er að gera nemandann læsan á umhverfi, samfélag og menningu, auðvelda honum að fóta sig og beita sér í mannlegu félagi og að temja honum gildi sem þar ríkir samkomulag um.
Í grunnskóla er viðfang samfélagsgreina þríþætt og milli þáttanna þarf að ríkja jafnvægi og tillit í skólastarfinu

- Námsefnið, þ.e. einstaklingar, samfélag og umhverfi í öllum fjölbreytileika í fortíð og nútíð
- Félagsfræði, landafræði, sagnfræði og fleiri fræðigreinar sem ljá náminu ýmis verkfæri til að takast á við og greina viðfangsefnin
- Nemandinn með persónueinkenni sín, reynsluheim og þroska

Skóli og heimabyggð
- þekki fáein atriði íslenskrar skólasögu, svo sem heimafræðslu, farskóla og heimavistarskóla
- þekki til nokkurra atriða í þróun heimabyggðar, t.d. byggingaframkvæmda og fleiri manngerðra breytinga á umhverfinu“

Ég ákvað að búa til kennsluvef um heimabyggð nemenda Grunnskólans í Þorlákshöfn, taka fyrir upphaf þéttbýlis í Þorlákshöf, þ.e. árin 1950 til 1960, 0g hugsaði söguaðferðina sem kennsluaðferð og samþættingu námsgreina. Við setningu markmiða verkefnisins yrðu áfangamarkmið við lok 4. bekkjar höfð í til hliðsjónar.

Benedikt Thorarensen, einn af frumbyggjum Þorlákshafnar, tók saman efni um upphaf þéttbýlis í Þorlákshöfn í tilefni af fimmtugsafmæli staðarins og veitti hann mér fúslega aðgang að því. Jón Sævar Baldvinsson, forstöðumaður bæjarbókasafns Sveitarfélagsins Ölfuss, lét mér í té gamlar myndir og Sigurður Jónsson einnig. Ég þakka þeim innilega veitta aðstoð.

Þessi vefur verður væntanlega í stöðugri þróun og vinnslu í einhvern tíma m.a. hef ég hugsað mér að taka viðtöl við nokkra frumbyggja og skrá niður ýmsar frásagnir sem tengjast byggðinni. Einnig væri gaman að taka fyrir örnefni, fjallahringinn, opinberar byggingar, önnur mannvirki og söguleg ártöl. Atvinnuvegi og fyrirtæki. Taka viðtöl við Vestmannaeyinga sem fluttu hingað eftir gos. Fjalla um félög, klúbba og menningu og nýbúa sem eru frá ýmsum löndum s.s. Póllandi, Mongólíu, Bretlandi, Danmörku, Færeyjum, Tailandi, Litháen og Filipseyjum. Það er af nógu að taka.

Saga Þorlákshafnar hefur verið rituð af fræðimanninum Skúla Helgasyni og er til í þremur bindum og spannar söguna frá 18. öld fram til ársins 1930. Nú hefur þráðurinn verið tekinn upp að nýju og er Björn Pálsson sagnfræðingur að skrifa framhald og þar mun væntanlega upphaf þéttbýlisins skipa stóran sess.