Um vefinn

Markmiðið með þessum vef er að kynna stuttlega sögu landgræðslu í Þorlákshöfn. Landgræðslustarf við Þorlákshöfn á sér langa og merkilega sögu og hefur Landgræðsla ríkisins unnið að henni ásamt sveitarfélaginu og íbúum þess.

Allt frá upphafi þéttbýlis í Þorlákshöfn, í kringum 1951, hefur stórkostlegur árangur náðst í heftingu sandfoks sem hafði ógnað byggð í gegnum tíðina.

Umgjörð þorpsins hefur breyst úr svörtum lit í grænan og garðar bæjarbúa skarta nú háum og fallegum trjám, auk skrautjurtum sem fáa hefði órað fyrir að hægt væri að rækta í Þorlákshöfn.

Landgræðsluátakið í Þorlákshöfn er merkilegt fyrir margra hluta sakir og þess virði að vekja athygli á því. Vefsíðugerð fannst mér vel til þess fallin að halda utan um upplýsingar og fróðleik sem nálgast mætti á Netinu.

Vinnan við verkefnið var þríþætt: Að afla heimilda, leita mynda -velja úr og vinna með, hanna og setja upp vefinn.

Í sambandi við heimildaöflun hafði ég fyrst samband við Guðjón Magnússon hjá Landgræðslu ríkisins í Gunnarsholti sem hefur haft umsjón með landgræðslunni í Þorlákshöfn. Hann byrjaði á því að aka um og ganga með mér um svæðið innan landgræðslugirðingarinnar og segja mér undan og ofan af landgræðsluverkefninu i gegnum tíðina, hvaða aðferðum hefur verið beitt, hvernig jarðvegurinn er, hvaða jurtir hafa verið notaðar og hvað hefur skilað bestum árangri.

Aðrar heimildir sótti ég í rit sem Landgræðsla ríkisins hefur gefið út, ritgerðir og skýrslur, auk þess að tala við frumbyggja og aðra íbúa sveitarfélagsins.

Gunnarsholt heimsótti ég tvisvar sinnum. Í fyrra skiptið var þegar Landgræðslan var með „opinn dag“ í ágúst þar sem starfsemin var kynnt. Seinna skiptið fór ég, þegar verkefnið var komið vel á veg og heimildavinnu að mestu lokið og textinn tilbúinn, til að fá ábendingar um hvort rétt væri farið með staðreyndir.

Að afla mynda var ærið verkefni og var ég svo heppin að komast í myndasafn þeirra Guðjóns Magnússonar hjá Landgræðslunni og Sigurðar Jónssonar hjá Sveitarfélaginu Ölfusi. Myndir þeirra notaði ég að mestu, auk nokkurra sem ég tók sjálf. Héraðskjalasafn Árnessýslu og Bæjarbókasafn Ölfuss var heimsótt í þeim tilgangi að leita gamalla mynda en það var lítið upp úr þeim heimsóknum að hafa. Íbúar bæjarfélagsins, sem ég leitaði til, voru reiðubúnir að leggja mikið á sig við að grafa upp gamlar myndir en þær hef ég lítið sem ekkert notað í þessu verkefni, þær bíða betri tíma. Fuglamyndirnar fékk ég hjá Jóni B. Hlíðberg og fékk leyfi til að nota þær í verkefnið. Myndirnar komu allar í stórri upplausn og minnkaði ég þær allar með leyfi höfundar og það sama gildir um hinar myndirnar sem ég nota.

Í upphafi hugsaði ég þennan vef eingöngu sem fræðslu- og upplýsingavef en ég var krafin um kennsluverkefni. Ég bjó til hugmyndabanka og kennsluleiðbeiningar fyrir kennara, auk nokkur nemendaverkefni fyrir 5. bekk.

Vefurinn er unninn í Dreamweaver og myndirnar í Fireworks. Eitt lag tók ég upp í Audacity sem er einfalt hljóðvinnsluforrit og fæst frítt á Netinu.

Vísað er í heimildaskrá á hverri síðu og nöfn ljósmyndara birt, jafnframt birtist texti þegar músarbendillinn er færður yfir myndirnar og segir hvaðan myndin er og hver tók hana.

Ég læt staðar numið að svo stöddu, þó ég eigi heilmikið efni enn. Ég mun án efa halda áfram með þennan vef í framtíðinni því viðmælendur mínir, starfsmenn Landgræðslunnar og sveitarfélagið hefur sýnt verkefninu áhuga.

Sigríður Guðnadóttir

 

Gróður í dvala

 

Myndir: Sigurður Jónsson, Sigríður Guðnadóttir og Guðjón Magnússon