14. febrúar 2004

Í morgun fór ég eldsnemma fram úr, fór í grænan silkislopp og staulaðist inn í tölvuherbergi. Nú átti að fara útbúa hljóðskúlptúr upp á 3 mín.

S.l. vika fór í að læra á klippiforrit og finna annað forrit til að þjappa hljóðinu saman í mp3. Langur tími fór í að brjóta heilann um hvernig ég gæti tekið upp hljóð og sett inn í tölvuna. Einhverjar græjur varð ég að hafa og eina lausnin sem ég sá að lokum var að tengja míkrafón við tölvuna. Á Selfoss var brunað og fjárfest í míkrafón.

Upp hófust miklar kúnstir með röddina en ég heyrði fljótlega að þetta var of einhæft þó mér fyndist mér takast vel upp! En þennan laugardagsmorgun var þemað orðið: Morgunstund gefur gull í mund.

Ég raðaði borðum í kringum mig og á þau raðaði ég ýmsum gagnlegum hlutum til að framkalla hljóð eins og vekjaraklukku, tannbursta, tannkrem, vatn, pilluglös, vatnsglös, kaffivél, brauðrist, ristað brauð, hrökkbrauð, smjör, hníf, dagblöð, stól, leðurstígvél, hurð og geislaspilara með geisladisk í. Þegar listaverkið var tilbúið var klukkan að ganga fimm og ég enn í silkisloppnum græna en komin í leðurstígél upp á miðja kálfa sem ég notaði til að búa til fótatak.

Ég gleymdi stund og stað. Hungrið sagði ekki einu sinni til sín enda búin að innibyrða nokkrar ristaðar brauðsneiðar til að ná hljóðinu þegar brauðið var smurt og tuggið.

Klippiforrit: Audacity
Tónlist: Who Will Buy?; Paula West
Lengd: 3.30 mín.