Þar sem ég er ekki í kennslu þetta árið þurfti ég að leita mér að nemendum til að fylgjast með. Ég hafði samband við deildarstjóra tölvudeildar Fjölbrautarskólans í Breiðholti, Jóhönnu Geirsdóttur, og fékk leyfi til að fylgjast með netnotkun í tölvuveri á föstudagseftirmiðdegi á vorönn 2003. Ég mætti um kl. 15 og hitti þar fyrir 14 nemendur sem sátu við vinnu og leiki.

Umhverfi rannsóknar: Tölvuver Fjölbrautaskólans í Breiðholti
Í tölvuverinu, sem að degi til er tölvukennslustofa, eru 16 nettengdar tölvur, prentari, skanni, myndvarpi og tússtafla. Í tölvunum eru hefðbundin notendaforrit, s.s. Office-pakkinn, Microsoft Visual Studio, Macromedia MX pakkinn, Photoshop, AutoCad og að auki voru leikirnir Quake og Halflife enn inni á skólanetinu, leyfar frá sæludögum. Þennan eftirmiðdag sem rannsóknin fór fram voru 14 nemendur staddir í tölvuverinu og 8 þeirra voru teknir í rannsóknina af tveimur rannsakendum. Tölvuverið er opið nemendum til afnota fram á kvöld alla virka daga. Rannsóknin var framkvæmd eftir skólatíma, nánar tiltekið kl. 15 á föstudagseftirmiðdegi. Það gæti hafa haft áhrif á tölvunotkun nemendanna í ljósi þess að helgi var framundan, erfið skólavika að baki. Í viðræðum við nemendur eftir rannsókn kom í ljós að 7 af 8 nemendum litu ekki á tölvuverið sem hluta af skólanum heldur töldu það vera utan skóla. Hugsanlega er það sökum þess að nemendur sækja það utan skólatíma. Svörin bera það með sér því að í spurningunni þar sem spurt er um: „Hvernig notar þú tækni/miðla helst í skóla“ spurðu 7 af 8 rannsakendum hvort ekki væri átt við tölvu/netnotkun í kennslustundum og miðast þeirra svör við það, þ.e. beina notkun tölva í kennslustund. Einn nemandi taldi tölvuverið vera hluta af skóla og miðast hans svör við það.

Val á þátttakendum
Í upphafi var spurt var um leyfi yfir hópinn og síðan valdi ég tvo stráka, 19 ára og 16 ára og þurfti ég að fá leyfi til að mega fylgjast með honum og var það hægur vandi þar er hann er sonur Ólafar S. Björnsdóttur. Einnig valdi ég tvær stelpur, 20 ára og 22 ára, en þau sátu öll við sama langborðið (6 tölvur við borðið) og fékk að fylgjast með tölvu/netnotkun þeirra í u.þ.b. 10 mínútur. Auðvelt var fyrir mig að hafa stól fyrir aftan þau til að fylgjast með og skrá niður. Því má segja að valið hjá mér hafi fyrst ráðist af staðsetningu þessara nemenda í stofunni og síðan í slembiúrtaki valdi ég 4 af þessum 6 sex sem sátu við borðið.

Framkvæmd
Tölvuverið í FB er opið nemendum til frjálsra nota, þó einkum sé ætlast til að þeir noti það til verkefnavinnu. Ég náði því að fylgjast með áðurnefndum fjórum nemendum sem sátu við tölvur í tölvuveri og unnu þar, ýmist verkefni fyrir áfanga í sínu námi eða í frjálsri netnotkun. Einn af þeim nemendum sem ég fylgdist með var að vinna verkefni í Excel sem hann átti að skila af sér útprentuðu, tveir nemendur sátu og skrifuðu blogg eða lásu blogg annarra og sá fjórði hamaðist við að bera saman verð DVD myndbanda í mynt Kanada og Bretlands og yfir í íslenskar krónur. Það var mjög athyglisvert að fylgjast með nemendunum og var ég ánægð að sjá hvað þeir voru góðir í fingrasetningu og blindskrift og voru einbeittir í því sem þeir voru að vinna við. Þetta voru allt nemendur sem höfðu fengið grunnkennslu í tölvunotkun í FB nema sá sem var 16 ára en hann hafði fengið kennslu í fingrasetningu í grunnskóla.

Ég tel mig hafa náð flestu sem fram fór og kóðaði ég svo gögnin eftir því inn á slóðina hjá Sólveigu Jakobsdóttur.

Ég tók einn nemanda fyrir í einu, sat á stól til hliðar og skráði á blöð flest allt sem fram fór í u.þ.b. 10 mínútur, t.d. hvaða síður var farið inn á, allar stellingar og hreyfingar nemandans, svipbrigði og ef samskipti áttu sér stað við aðra nemendur í tölvuverinu eða við tölvuna sjálfa. Ég reyndi að lýsa sem best vinnuferli og öðru þess háttar sem fram fór. Að lokum kóðaði ég gögnin eftir fyrirmælum og sendi þau inn á slóðina hjá Sólveigu Jakobsdóttur.

Að athugun lokinni tók ég viðtal við hvern og einn nemanda. Þeir svöruðu spurningunum sem settar eru fram á eyðublöðunum. Reyndi ég að skrá svör þeirra með þeirra eigin orðum og má segja að sammerkt með öllum svörum hafi verið að þau voru mjög stutt og snaggaraleg.

Eftir að ég lauk að kóða gögnin sendi ég þau inn á vefinn og fékk númerin 370, 371, 373 og 374. Númer 372 er frá mér en þar virtist kyn þátttanda hafa fallið niður svo ég sendi það rétt inn og það fékk númerið 373. Númer 372 er því ekki talið með.

Sjá nánar á:

http://soljak.khi.is/netnot/kodun.asp
http://soljak.khi.is/netnot/yfirlit.asp