Varist mjög smátt letur
Lesendur vilja ekki þurfa að leggja nefið upp að skjánum til þess að lesa það sem þú hefur skrifað. Mundu líka að takmarka leturgerðirnar sem þú notar og notaðu eingöngu þær algengustu.

Ofnotið ekki ramma
Margir notendur kvarta undan síðum sem eru byggðar upp á römmum. Það verður að vera góð ástæða fyrir því að sami ramminn sjáist á öllum síðunum.

Látið texta ekki renna saman við bakgrunn
Enginn vill lesa gráan texta á hvítum grunni. Sýnið lesendum ykkar tillitsemi og gætið að þessum litum. Hafið einnig í huga að lesendur ykkar gætu verið lesblindir og þess vegna ætti að varast ákveðna liti á stöfum.

Varist órólega bakgrunna
Órólegir bakgrunnar geta truflað lesendur svo að þeir missa athyglina. Notið ljósa, mjúka bakgrunna sem krefjast ekki athygli.

Notið liti sem tóna saman
Varist að vera með miklar andstæður í litum á texta, bakgrunni, hnöppum og öðru því sem þið setjið á heimasíðuna. Í Theme er hægt að skoða heppilegar litablöndur.

Varist breytingar á leturgerðum og litum
Vefarar sem falla í þá freistni að blanda saman mörgum litum og leturgerðum, jafnvel nýtt letur og nýr litur á hverri málsgrein, rugla lesendur sína og þeirr missa fljótt þráðinn.

Látið töflur hjálpa ykkur við að skipuleggja síðurnar
Það er erfitt að lesa langan texta á skjánum. Hafið textann stuttan og hnitmiðaðan. Brjótið hann upp með listum eða myndum.

Einfaldar vefsíður
Reynið að hafa hverja síðu einfalda. Munið að flóknar síður eru lengi að hlaðast inn og það líkar lesendum ekki. Verið ekki að troða tækniatriðum inn á síðurnar bara af því að þið kunnið það.