Í lok síðustu ísaldar fyrir u.þ.b. 10.000 árum var Seltjarnarnesið allt undir sjó. Efstu hlutar Háaleitis og Öskjuhlíðar voru þá eyjar. En síðan hefur mikið vatn runnið til sjávar, Seltjarnarnesið risið úr sæ og blómleg byggð vaxið á Háaleitinu. Háaleitisbrautin er kennd við Háaleitið.

Háaleitishverfið fór að byggjast upp í kringum 1960, en áður voru þarna sveitabæir og kartöflugarðar.

Höfundur þessa vefs fluttist í hverfið um hvítasunnuna 1963. Þá var komin nokkuð mikil byggð við Háaleitisbrautina, Safamýrina og Álftamýrina. Múlakampurinn stóð enn með sinni blönduðu byggð og síðasti sveitabærinn Seljaland stóð þarna á horninu á Háaleitisbraut og Ármúla. Þangað fórum við og keyptum egg hjá henni Elinborgu, en hún var með þó nokkurn búskap. Elinborg var þó ekki með eina eggjabúið í hverfinu. Áður en Háaleitishverfið fór að rísa ráku bakarar stórt hænsnabú á svæðinu þar sem nú er Eurocard í Ármúla.

Allar götur voru ómalbikaðar 1963. Strætisvagninn sem gekk um hverfið hét Safamýri leið 25 og hann keyrði ýmist upp Safamýrina og niður Háaleitisbrautina eða öfugt. Fyrstu ferðin fór hann 20. desember 1962.

Engar verslanir voru þarna fyrstu árin. Íbúar þurftu að fara út í Múlakamp til þess að kaupa mjólk og aðrar nauðsynjar eða fara út í Austurver (Lídó), en sú verslun var á móts við Ísaksskóla. Það var oft löng leið að bera heim mjólk fyrir 7 manna fjölskyldu. Á þessum tíma þótti sjálfsagt að börnin færu gangandi út í búð til þess að kaupa í matinn.

1965 kom loks nýlenduvöruverslun í hverfið. Það var verslunin Víðir sem Sigurður Matthíasson rak ásamt fjölskyldu sinni. Hún var staðsett við Starmýri og þótti mjög glæsileg verslun.

Á þessum tíma var Múlakampurinn að hverfa en göturnar Ármúli, Síðumúli og Selmúli tóku að byggjast og fyrirtækjum í hverfinu fjölgaði hratt.