Fjölbýlishúsin í Háaleitishverfinu svipar flestum saman. Fjögurra hæða blokkir, litlar svalir og stórir stofugluggar eru höfuðeinkenni þessarra húsa. Í þessum blokkum eru oftast tvær íbúðir á hverri hæð en þó eru í sumum þeirra þrjár íbúðir á hverri hæð. Algeng fjölskyldustærð í upphafi (fram til 1970) var 5 - 7 manns þ.e. hjón með 4 - 5 börn, en í dag eru aðeins örfáar fjölskyldur fjölmennari en 5.

Einstaka blokkir skera sig þó úr hinu almenna útliti og ber þá fyrst að nefna Sigvaldablokkina sem er Háaleitisbraut 109 - 111. Hún var teiknuð af Sigvalda Thordarsyni, arkitekt og er mjög falleg. Litaval á henni var líka alltaf annað en á hinum blokkunum í hverfinu og hefur haldist óbreytt.

Við Safamýri voru byggð tvíbýlis- og þríbýlishús en við Álftamýri, Starmýri og Háaleitisbraut risu auk blokkanna einnig raðhús.

Þetta er í stórum dráttum lýsing á íbúðarhúsnæðinu í hverfinu, aðrar byggingar eru allar tengdar atvinnurekstri en fjölmörg fyrirtæki hafa aðsetur í hverfinu.