Eftir því sem árin hafa liðið hefur skólum og menntastofnunum fjölgað. Fyrst reis Álftamýrarskóli og hófst kennsla þar haustið 1964. Áður höfðu börnin í hverfinu flest farið í Laugarnesskóla. Álftamýrarskóli er grunnskóli og í dag eru u.þ.b. 380 nemendur í skólanum. Um 1970 fór nemendafjöldinn yfir 1200. Þá var fyrsta kynslóð hverfisins að vaxa úr grasi. Skólinn var þrísetinn og kennt frá 8 til 5 á hverjum degi. Nemendur mættu í skólann kl. 8:00, kl. 12:00 og kl. 15:00

Ármúlaskóli var tekinn í notkun í kringum 1980. Hann var byggður úti í gryfju eins og sagt var í hverfinu en svæðið þar sem hann stendur í dag var áður grjótgryfja Reykjavíkurhafnar.

Tveir leikskólar eru í hverfinu, Álftaborg og Múlaborg. Það er einnig gæsluvöllur við hliðina á Álftaborg.

Íþróttafélagið í hverfinu er Fram. Framarar byggðu sér félagsheimili við Safamýri og reisulegt íþróttahús. Þeir reka öflugt íþróttastarf fyrir börn og unglinga. Í félagsheimili þeirra er einnig félagsmiðstöðin Tónabær.

Danskóli Hermanns Ragnars var til margra ára á efri hæðinni í Miðbæ. Jazzballetskóli Báru er við Lágmúla.

Sóknarkirkja hverfisins er Grensáskirkja en í upphafi áttu margir íbúar hverfisins kirkjusókn í Háteigskirkju.