Mynd þessi var hugsuð sem stutt kynning á dönskukennslu í Álftamýrarskóla. Skólinn er móðurskóli í tungumálum og þegar sú beiðni barst frá FMR að skólinn tæki þátt í að kynna móðurskólaverkefnið á sýningu sem haldin var í anddyri Borgarleikhússins í mars s.l. ákvað ég að slá tvær flugur í einu höggi. Ég hófst handa í febrúar og tók upp mikið af efni eða tæplega tvær klukkustundir. Það skal tekið fram að ég hef ekki áður tekið videó og mér tókst að gera öll byrjendamistök sem hægt er. Þegar töku lauk tóku við klippingar. Myndin sem sýnd var í Borgarleikhúsinu var 32 mínútur en það sem nú hefur verið sett á netið er tæpar 9 mínútur. Verkefni þetta var unnið á nokkurra ára gamla videó vél og því miður hafði ég ekki aðgang að góðum hljóðnema. Myndin er vistuð með það í huga að hún verði sem léttust í flutningi á netinu. Við góðar aðstæður rennur hún upp á augabragði, en við verri aðstæður getur tekið nokkrar mínútur að hlaða henni inn. Öll vinnsla fór fram í Movie Maker.