Á nokkuð löngum ferli mínum sem tölvukennari hef ég farið í gegn um ýmiskonar tímabil. Í byrjun, þá kunni ég næstum ekki neitt nema að vinna í ritvinnslu og hafði það eitt í farkestinu þegar ég tók fyrstu nemendurna. Þau voru ósköp jákvæð og kvörtuðu ekki, en mér fannst þetta ekki vera spennandi kennsla svo fljótlega fór ég með þau í mjög einfalda forritun af því það var það sem flokkaðist undir tölvukennslu í þá daga. Sem betur fór fylgdi lítil kennslubók með forritinu og í sameiningu fórum við í gegnum þetta. Þetta leit illa út í byrjun en þegar árangurinn fór að koma í ljós varð virkilega gaman í tímum. Mér fannst ég þó aldrei verða nógu góð í þessu svo ég hélt áfram að leita nýrra leiða. Með hinni hefðbundnu ritvinnslu notaði ég og nota enn alltaf talsvert af kennsluforritum til þjálfunar á því námsefni sem nemendur voru að glíma við hjá öðrum kennurum. Kennsluforrit eru mjög mismunandi en ég hef alltaf átt mér nokkur uppáhaldsforrit í gegnum tíðina. Í dag eru öll þau gömlu dottin út, ganga ekki í nýja MX umhverfinu, en í staðinn höfum við fengið mörg ný og alveg frábær forrit og eru mjög mörg þeirra gefinút af Námsgagnastofnun.

Það eru mörg ár síðan ég fór að velta fyrir mér frekari möguleikum nemenda til þess að nýta tölvurnar til frekara og/eða annars konar náms. Þar fannst mér tungumálanám vera mjög skemmtilegur möguleiki og hef reynt það margoft. Fyrst var það KidLink. Það var mjög skemmtilegt tímabil. Þetta var verkefni þar sem nemendur byrjuðu á að svara fimm spurningum og eftir það opnuðust ótal möguleikar. Nemendur mínir tóku þátt í ýmis konar verkefnum, eignuðust pennavini og kynntust nýjum siðum og löndum í gegnum jafnaldra sína. Í framhaldi af þessu fór ég talsvert í ircið. Það er möguleiki sem því miður hefur orðið undan að víkja vegna hræðslu við undarlega einstaklinga sem reyna að misnota börn í gegnum netið. Það er þó til lausn á þessum vanda, sem eru lokaðar rásir. Þar geta bekkir haft samskipti sína á milli og þar held ég að sé ónýttur möguleiki tungumálakennslu. Börnin/unglingarnir læra tungumál jafnaldra sinna og það læra þau ekki í kennslustundum hjá okkur.

Núna síðustu árin hef ég verið mjög upptekin af námsefni á vef. Mér finnast möguleikar vefsins ótrúleg spennandi. Ég hef sjálf unnið nokkra slíka vefi. Ég byrjaði á einum í frönsku en bjó hann til þegar dóttir mín tók að sér frönskukennslu fyrir börn á vegum Háskólans. Sá vefur er ætlaður algjörum byrjendum. Þar reyndum við að setja inn almennar upplýsingar sem gætu vakið áhuga barna en að sjálfsögðu er þar líka dálítil franska og t.d. barnalög sem nemendur gátu æft sig að syngja heima (því miður virka ekki allar krækjurnar lengur). Í framhaldi af því hóf ég síðan vinnu við dönskuvef og fékk dönskukennara skólans til samstarfs við mig. Sá vefur er ætlaður unglingum sem hafa nokkra þekkingu í dönsku og þess vegna er hann næstum allur á dönsku. Þetta er orðinn mjög stór og öflugur vefur með mjög fjölbreyttum verkefnum.

Ég held að það sé mjög gott að vera tvær við vinnu og uppbyggingu á svona vef. Samstarf okkar hefur verið mjög gott, hún vinnur verkefnin, ég tæknivinnuna en svo höfum við reglulega stutta fundi og þar skiptumst við á hugmyndum og tillögum. Verkefni eins og þessi vefur eru ekki búin til á einni kvöldstund, þetta er margra mánaða vinna og eiginlega lýkur henni seint eða aldrei.