Forsíða - Frá nemendum
Meðmæli með bók

©Fanney Halldórsdóttir
nemandi í fjarskóla KHÍ
vor 2000

Eyrun á veggjunum  

Eyrun á veggjunum
Sagan er fyrstupersónu frásögn sögð af fimm ára stúlku. Stúlkan segir frá skemmtilegum atburðum og reynslusögur úr eigin lífi. Aðrar persónur sögunnar koma einungis fram í frásögn stúlkunnar og einskorðast þær við foreldra hennar og félaga. Sögusviðið er hugarheimur stúlkunnar, leikskólinn og heimili hennar.

Bókin skiptist í tíu stutta og sjálfstæða kafla sem allir segja frá einhverri reynslu sem þessi fimm ára stúlka hefur lent í. Einungis ein persóna er nafngreind í sögunni og er það Matti, leikfélagi stúlkunnar, hinar persónur bókarinnar bera einungis þau venslanöfn er tengja þau stúlkunni eins og mamma, afi, systir o.s. frv. Þetta er skemmtileg aðferð höfundar til þess að fá börnin til þess að lifa sig inn í frásögnina. Ég tel að þannig nái börnin að samsama sig betur við reynslusögur stúlkunnar sem margar hverja lýsa þeim hugsunum og þeirri reynslu sem börn á þessum aldir eru að upplifa. Ég valdi bókina einmitt vegna þess að frásögn stúlkunnar er svo innileg og eðlileg og vegna þess að þessi saga á vel heima inni í skólastofu hjá nemendum á yngsta stigi grunnskólans.

Sagan
Það er fimm ára gömul stúlka sem ávarpar lesendur strax í upphafi bókarinnar. Stúlkan býr hjá mömmu sinni, stóru systur og litla bróður en pabbi hennar býr í útlöndum. Hún á eina hálf systur sem hún hefur haft miklar áhyggjur af, því hún á svo erfitt með að skilja það hvernig börn geta verið hálf. Hálf systir! Hvað hafði komið fyrir? Hvernig var hún? Var hún efri parturinn eða neðri parturinn eða önnur hliðin? Gat hún talað? Gat hún nokkuð borðað? Ó, bara að ég hefði átt tvær hálfsystur þá hefði verið hægt að gera úr þeim eina heila  (Herdís Egilsdóttir:16).

Í bókinni veltir þessi ábyrgðafulla stúlka upp spurningum um lífið og tilveruna og tekst á við "stórvandamál hversdagsins";  Matti ætlar að giftast henni, hún þarf að hugsa um litla bróður, hjálpa skúringarkonunni og bjarga fjölskyldunni frá bófunum í sjónvarpinu. Hún hefur mikla ábyrgðartilfinningu gagnvart bróður sínum og þarf oft að ræða alvarleg málefni við mömmu sína.

Vangaveltum og uppgötvunum barnsins eru gerð góð skil á stórskemmtilegan hátt. Stúlkan er klók og úrræðagóð og hefur ráð undir rifi hverju. Hnyttin tilsvör, og bráðfyndnar úrlausnir þessarar kostulegu og framhleypnu stúlku gera þessa yndislegu frásögn hennar í senn skemmtilega og innilega. Höfundur nálgast hér hugarheim barnsins á einfaldan og raunsæan hátt.

Heimildir:
 Herdís Egilsdóttir. 1986. Eyrun á veggjunum. Reykjavík. Æskan. Vilhelm G. Kristinson. 1993. Samtíðarmenn. Reykjavík Vaka-Helgafell.

Lesið um höfundinn Herdísi Egilsdóttur