Forsíða 
Vefleiðangur

Höfundarkynning

Kynning | Verkefni | Bjargir | Ferli | Mat | Niðurstaða

Kynning

Þegar verið er að vinna með bókmenntir í skólanum rekast kennarar oft á hversu erfitt getur verið að finna upplýsingar um höfunda barna- og unglingabóka, einkum þá yngri. Nú á tímum er það hluti af því að vekja athygli ungra lesenda á bókmenntum að kynna höfunda þeirra. Netið er ágætur miðill til að birta á nýjar upplýsingar og þar er stöðugt  hægt að uppfæra viðbætur. Á vefnum BarnUng er meiningin að koma upp upplýsingabanka um höfunda  barna- og unglingabóka á íslensku.Þetta verkefni er liður í því.

Verkefni

• Verkefnið felst í að velja sér einn höfund til kynningar
• Þú þarft að kynna þér nokkrar almennar staðreyndir um ævi höfundar t.d. aldur og viðurkenningar
• Þú þarft að kynna  þér þær bækur og önnur verk sem höfundur hefur samið
• Þú þarft að hafa í huga til hverra kynningin á að höfða, kennara, foreldra eða lesenda sem eru börn- eða unglingar 
• Þú þarft að hugsa um að framsetningin sé þannig að hún veki áhuga á höfundinum. 
• Uppsetning efnisins verður líka að taka mið af markhópnum sem kynningin er gerð fyrir. 
• Það skiptir t.d. máli  bæði hvort og hvernig þú notar myndefni og eins uppsetning textans t.d. notkun millifyrirsagna 

Bjargir

Á BarnUng-vefnum er listi yfir tiltækar handbækur um höfunda barna og unglingabóka. 

Á höfundasíðu BarnUng bætast smám saman fleiri höfundar sem finna má um á Netinu.

Höfundavefur Máls og menningar og Forlagsins hefur upplýsingar um sína höfunda.

Flettið upp í Gegni og Greini.

Reynið leitarvélar á Ísmennt t.d. íslensku vélina  Leit.is.

Í tímariti Ibby-samtakanna á Íslandi, Börn og mennig, hafa birst kynningar á nokkrum yngri höfundum.

Ferli

1. Fyrsta skrefið gæti verið að skrá hjá sér þá höfunda sem manni finnst áhugaverðir og skemmtilegir og velta fyrir sér úr hvaða möguleika maður sér á að gera áhugaverða kynningu á hverjum um sig.
2. Síðan væri gott að velta fyrir sér hvernig verkin eftir höfundinn eru og hvernig hægt er að nýta þau í kynningu á höfundinum. Til dæmis hvort höfundurinn hefur skapað eftirminnilegar persónur eða umhverfi.
3. Þriðja skref að afla upplýsinga  í heimildunum sem bent er á og víðar.
4. Fjórða skref að áveða markhópinn sem kynningin á að höfða til
5. Fimmta skref að útfæra kynninguna. (Ef þið viljið gera krækjur í aðra staði í Netinu þá get ég séð um það fyrir ykkur ef þið kunnið það ekki. Láta mig bara vita hvar á að vera krækja. Eins er með myndir)
6. Og loks að senda afraksturinn fyrir 1. apríl 2000 
   sem Assignment inn á Learning Space námsrýmið okkar

Mat

Kennarinn setur sig í stellingar ritstjóra vefsins BarnUng þegar hann metur höfundarkynningarnar. 
Hann hefur þá í huga  fyrst og fremst hvort kynningin á höfundinum sé nógu vel skrifuð til að standast kröfur um birtingu. Lýsingin þarf að vera skýr  í framsetningu og líflega stíluð.  Frjóar hugmyndir í efnistökum og framsetningu eru eftirsóknarverðar.

• Sé kynningin skýr  í framsetningu og líflega stíluð og endurspegli frjóar hugmyndir  fær nemandinn einkunn A eða 9-10.
• Sé kynningin vel frambærileg en  ritstjóranum finnist að hægt væri að vera gera hana líflegri og/eða markvissari  kynningu fær nemandinn einkunn B eða 7-8.
• Ef kynningin og framsetningin  eru þannig  að ritstjóranum finnist hún ekki líkleg til að þjóna þeim tilgangi að vekja áhuga markhópsins á höfundinum fær nemandinn einkunn C eða 5-6.
• Finnist kennara kynningin svo ósannfærandi að honum sýnist að hún sé líkleg til að fæla  frá  áhuga á  verkum höfundarins fær nemandinn falleinkunn og verður að gera aðra tilraun.

Niðurstaða

Kynningar ykkar verða sett á vefinn BarnUng sem liður í að byggja upp gagnabrunn um barna- og unglingabókmenntir   á íslensku á Netinu.
Þið eigið höfundarréttinn á textum ykkar og ekkert verður sett á vefinn nema með ykkar leyfi. Þið getið líka sjálf ákveðið hversu lengi efnið ykkar má vera á BarnUng.

Þessi vefleiðangur er saminn 22. febrúar 2000 fyrir fjarnámskeið í grunnskólaskor KHÍ

Salvör Gissurardóttir þýddi þetta snið frá The Webquest Page.