Forsíða - Frá nemendum
Meðmæli með bók

©Bryndís Guðmundsdóttir
nemandi í fjarskóla KHÍ - grunnskólaskor
vor 2000

Sagan af bláa hnettinum
 eftir Andra Snæ Magnason

Bókin Sagan af bláa hnettinum er eftir Andra Snæ Magnason og kom út fyrir síðustu jól (1999).  Bókin hlaut Íslensku bókmenntaverðlaunin 1999 og hefur hlotið mikið lof gagnrýnanda.  Andri Snær, sem fæddur er í Reykjavík þann 14. júlí 1973,  hefur getið sér gott orð fyrir leikrit, ljóð og smásögur.  Útgefnar bækur Andra Snæs eru þrjár fyrir utan Söguna af bláa hnettinum.  Þær eru: Engar smá sögur, Bónusljóð og Ljóðasmygl og skáldarán. 

Sagan af bláa hnettinum       

Bókin Sagan af bláa hnettinum er hrífandi ævintýri skreytt áhrifamiklum litmyndum Áslaugar Jónsdóttur.  Sagan gerist lengst úti í geimnum þar sem búa ótal börn sem fullorðnast ekki og lifa óspjölluð og saklaus þar til dularfull vera, maður að nafni Gleðiglaumur, lendir á hnettinum þeirra og kemur róti á lífsviðhorf þeirra.  Aðalpersónurnar Brimir og Hulda leiða okkur í gegnum ævintýrið á einlægan hátt og má segja að hún sé tileinkuð barninu í okkur öllum.  Erum við kannski búin að týna sjálfum okkur? 

Ævintýrið er óháð tíma eins og svo mörg önnur ævintýri og sögusviðið er geimurinn.  Sagan er spennandi og margar hættur verða á vegi barnanna á leið þeirra um myrka skóga, djúpa dali og loftin blá og reynir þá sem aldrei fyrr á vináttu og ráðsnilld þeirra.  Mikil spenna er í atburðarásinni og það er eins og lesandinn sem og hlustendur fari ósjálfrátt inn í sögusviðið og taki þátt í ævintýrinu.

Hvers vegna þessi bók?

Ástæða þess að ég mæli með bókinni Sagan af bláa hnettinum er sú að þegar ég las bókina fyrir bekkinn minn, sem eru sjö ára nemendur, þá urðum við öll svo hugfangin að við gátum ekki hætt að lesa.  Allir biðu í ofvæni eftir næsta kafla og eftirvæntingin skein úr augum nemenda og það allra besta var að ég, kennarinn, var jafn spennt og nemendurnir.  Það er sagt að aðall góðra barnabóka sé að þær séu við hæfi allra barna og ekki síður fullorðinna og það var einmitt raunin við lestur bókarinnar.  Í bókinni er boðskapur sem allir geta tileinkað sér jafnt ungir sem aldnir.  Höfundur tekur fyrir ýmislegt í lífinu og ímyndunaraflið leikur lausum hala.  Efni bókarinnar minnir mig mikið á eina af uppáhaldsbókunum mínum, Litli prinsinn sem kom út 1943 í Frakklandi og var hún valin bók aldarinnar þar í landi.  Það á svo vel við um báðar þessar bækur sem stendur á kápu bókarinnar, að sagan sameini einfaldleik og dul, létt gaman og djúpa alvöru, og að hún sé svo veruleg og óveruleg í senn að við vitum varla lengur við lestur hennar hvort veruleikinn er draumur eða draumurinn veruleiki og sagan endar í spurn, spurn um tilgang lífsins.

“Sagan af bláa hnettinum” á erindi til allra, ég hef lesið hana fyrir fjögurra og tíu ára syni mína sem báðir urðu hugfangnir, sem og bekkinn minn.  Sagan vekur mann til umhugsunar um gildi lífsins og höfundur nær á svo áhrifaríkan hátt að endurvekja ævintýrið.  Vonandi eigið þið eftir að nálgast bókina hvort sem er fyrir ykkur sjálf eða fyrir nemendur ykkar og ekki yrði verra ef  bókin yrði sett á fjalir leikhúsanna, því hún á fullt erindi þangað.