Vefurinn   Vefurinn "Börn og hugmyndir" er unninn af frumkvæði nokkurra einstaklinga og hópa sem starfað hafa að eflingu hugvits meðal barna á norðurlöndum. Þegar litið er yfir það starf sem unnið hefur verið á norðurlöndunum má sjá margt sameiginlegt en líka margt sérstakt. Ráðist var í það að byggja upp vef til að miðla upplýsingum um það starf sem nú þegar hefur farið fram á norðurlöndum í þeirri von að það geti styrkt enn frekari þróun þess. Kennaraháskóli Íslands og Ísmennt munu fóstra vefsvæðið á búnaði sínum og veita honum nauðsynlega þjónustu. Norræna ráðherranefndin styrkir gerð vefsins.   Markhópar Vefnum er ætlað að upplýsa almenning og stofnanir um eðli og mikilvægi nýsköpunarstarfs fyrir uppeldi barna. Jafnframt er vefnum ætlað að vera hjálpartæki í formi upplýsingaveitu til handa þeim sem eru beinir þátttakendur í nýsköpunarstarfi. Skóla og barnavefur er til dæmis sérstaklega ætlaður markhópnum börnum og kennurum. Og hægt verður að nota sérstaka leitarvefi er tengjast hugverkum sem búið er að skrá og ræða einstök mál á vefráðstefnum.   Uppbygging Vefurinn er byggður upp í þremur meginþáttum: 1.Yfirlitsvefur er gerir grein fyrir eðli nýsköpunarstarfs og þeim nýsköpunarverkefnum (sjá efnisyfirlit vinstra megin) sem eru í gangi á norðurlöndum í dag. Sá hluti sem þú ert að lesa núna er hluti af þessu sameiginlega yfirliti eða inngangur að öllu því sem finnst um nýsköpunarstarf meðal barna á norðurlöndunum. Í þessum inngangi er fjallað um þætti sem eru sameiginlegir með öllum verkefnunum. Til þess að gæta jafnræðis þá verður sami inngangur skrifaður á öllum norrænu tungumálunum, íslensku, dönsku, sænsku, norsku og finnsku. Jafnframt verða allar upplýsingar þýddar á ensku og settar á sérstakan vef sem verður einskonar safnvefur sem hvert land getur nýtt að vild 2. Þáttur hvers lands (efst uppi), sem ritstjóri hvers lands hefur umsjón með. Það sem kemur svo inn á svæði hvers og eins lands er að sjálfsögðu í höndum þeirra sem vilja koma vinnu sinni á framfæri. Hér verður áhersla lögð á sérstakan skólavef tileinkaður kennurum og öðru skólafólki, barnavef sem ætlaður er börnum sem eru að fást við nýsköpun og greinargerð eða vefsíður um þau verkefni sem eru í gangi í hverju landi. Ennfremur gerir hvert land grein fyrir samstarfsaðilum sínum og þeim er styðja verkefnin. 3. Sameiginlegir þættir(neðst niðri) sem eru ekki beintengdir við einstök verkefni, en nauðsynlegt að hafa aðgang að eins og krækjur, ráðstefnur, leitarsíður, fréttabréf, samstarfsaðilar og styrktaraðilar.   Veftré Á eftirfarandi mynd má sjá nákvæmari uppbyggingu vefsins til frekari glöggvunar.