Samantekt af fundi 3. nóvember 1997 í menntamálaráðuneytinu vegna samnorræns verkefnis um "entreprenörskap"
Á fundinum voru mættir
- frá þátttökuskólunum: Ragnar Gíslason, Kolbrún Ingólfsdóttir, Skúli Gunnarsson og Sigurlaug Jónsdóttir frá Foldaskóla, Guðmundur Birkir Þorkelsson og Ingólfur Freysson Frhsk Húsavík, Jóhannes Einarsson og Ástþór Ragnarsson, Iðnsk. í Hafnarfirði og Jón F. Hjartarson og Valgeir S. Kárason, FNV Sauðárkróki
- frá samráðshópi: Guðrún Þórsdóttir Fræðslumiðstöð Rvk, Kristrún Ísaksdóttir og Guðni Olgeirsson menntamálaráðurneyti, (Gísli Þorsteinsson frá KHÍ var fjarverandi)
Markmið fundarins var að fara yfir stöðuna varðandi þátttöku Íslands í verkefninu og myndun tengslanets innanlands til stuðnings og gagnkvæmrar upplýsingamiðlunar.
1. Almennt um norræna verkefnið
• Rifjuð upp tildrög og markmið verkefnisins og dreift minnisblaði menntamálaráðuneytis frá mars 1997 sem skólarnir fengu sent sl. vor.
• Hin Norðurlöndin eru komin lengra í opinberri stefnumótun er varðar eflingu frumkvöðlahæfileika nemenda og voru gögn því til staðfestingar lögð fram til skoðunar .
• Dreift var skýrslu frá ráðstefnunni í Lyngby í apríl sl. þar sem verkefninu var hleypt af stokkunum.
• Verið er að vinna að gerð norrænnar heimasíðu verkefnisins á Norræna skólanetinu (Odin) með tengsl inná vefsíður einstakra landa.
• Mynduð hafa verið 10 tengslanet skóla í þremur eða fleiri löndum og taka Íslendingar þátt í 5 þeirra.
2. Almennt um þátttöku Íslendinga
• Vonast er til að opinber stefnumótun hérlendis leiði af þeirri áherslu sem lögð er á frumkvæði og nýsköpun í undirbúningi að gerð nýrrar aðalnámskrár, sbr t.d. lokaskýrslu forvinnuhóps fyrir upplýsinga- og tæknimenntir í grunn- og framhaldsskólum.
• Nauðsynlegt er að tekið verði saman kynningarefni á íslensku um norræna verkefnið í heild sinni.
• Finna þarf umsjónaraðila fyrir íslensku vefsíðuna og marka stefnu um innihald hennar.
• Brýnt að íslensku þátttökuskólarnir myndi með sér samstarfsnet. Til að auðvelda þetta var ákveðið að fá Íslenska menntanetið til að útbúa póstlista fyrir samstarfsaðilana innanlands.
• Settur hefur verið á laggirnar samráðshópur vegna verkefnisins. Í honum eru Guðrún Þórsdóttir kennsluráðgjafi, Fræðslumiðstöð Reykjavíkur og Gísli Þorsteinsson lektor, Kennaraháskóla Íslands auk Guðna Olgeirssonar og Kristrúnar Ísaksd. frá ráðuneytinu. Einnig var óskað eftir tilnefningu frá Háskólanum á Akureyri en hann sá sér ekki fært að verða við því.
3. Hlutverk og ábyrgð þátttökuskóla og þátttakenda.
• Samráðshópur og ráðuneyti vænta mikils af þátttökuskólunum. Þeim var gefinn kostur á þátttöku vegna starfs síns á sviði frumkvöðlanáms.
• Fulltrúar þátttökuskólanna eru brautryðjendur í frumkvöðlamennt í grunn- og framhaldsskólum og samstarfi skólastiganna þar um. Mikilvægt er að þeir líti á sjálfa sig sem frumkvöðla og sýni það í verki innan samstarfsins.
• Sérhver skóli verður að taka ábyrgð á því að þátttakan gangi snurðulaust fyrir sig þó breytingar kunni að verða á kennaraliði.
• Leggja þarf áherslu á að frumkvöðlamennt eða framtaksverkefni sé/verði eðlilegur liður í skólastarfinu og samtengd annarri kennslu en ekki einangrað fyrirbæri.
•Nauðsynlegt er að kynna verkefnin vel bæði innan skóla og utan og nýta fjölmiðla eins og hægt er í útbreiðslustarfinu.
• Sérhver þátttökuskóli þarf að gera framkvæmda- og fjárhagsáætlun fyrir sitt frumkvöðla&endash;verkefni og óskað eftir að slíkar áætlanir verði sendar samráðshópi í upphafi næsta árs.
4. Fjármál
• Norræna fjárveitingin er einungis ætluð til sameiginlegra þarfa, s.s. ráðstefnur og fundi.
• Gert var ráð fyrir kr. 800.000 í fjárlagatillögum ráðuneytisins fyrir árið 1998 vegna kostnaðar við verkefni innanlands.
• Hægt er að sækja um styrk allt að 50.000 danskra kr. til Norrænu ráðherranefndarinnar vegna þýðingarkostnaðar íslenskra þátttakenda. Rætt var um að Kristrún sendi sameiginlega umsókn héðan upp úr áramótum.
• Ekki er gert ráð fyrir að styrkja eða kosta þýðingar á útgefnum námsgögnum.
5. _Örfréttir" af verkefnum þátttökuskólanna
Foldaskóli:
• Ragnar sagði í stuttu máli frá frumherjastarfi skólans á sviði nýsköpunar.
• Sigurlaug sagði frá þriggja landa samstarfi 6 ára barna þar sem þau byrja á að fræða börn í öðrum löndum um landið sitt og síðan er ætlunin að skiptast á ævintýrum. Notuð verða ýmis tjáningarform og miðlar.
• Skúli sagði frá nýsköpunarverkefni 12 ára nemenda. Samstarfið í norræna hópnum er lítið farið af stað, en ákveðið hefur verið að byrja á að vinna með auðlindir í nánasta umhverfi og skiptast á upplýsingum um það.
Fjölbrautaskólinn á Sauðárkróki:
• Jón sagði frá því að vegna fjárskorts hefði skólinn hætt við fyrirhugað frumkvöðlaverkefni þannig að ekkert slíkt væri í gangi núna.
• Valgeir var nýkominn af skipulagsfundi norræna samstarfshópsins í Kaupmannahöfn. Sameiginlegt verkefni er rafrænt fréttablað. FNV stofnaði sérstakan valáfanga utanum verkefnið og völdu hann 10 nemendur. Dönskukennari og tæknikennari aðstoða nemendur við fréttamennsku og _blaðaútgáfu". Norræna samstarfið lofar góðu.
Framhaldsskólinn á Húsavík:
• Guðmundur Birkir sagði frá þróun frumkvöðla-/framtaksmenntar við skólann frá upphafi þessa áratugar, með rætur í hugmyndum Norðmanna um _héraðshollan" skóla, stofnun almennrar verknámsbrautar fyrir fornámsnemendur og tilurð tveggja skylduáfanga í atvinnufræðum fyrir velflesta nemendur skólans.
• Ingólfur sagði frá uppbyggingu atvinnufræðiáfanganna þar sem nemendafyrirtæki er þungamiðja. Starfið í norræna hópnum er tæpast farið af stað.
Iðnskólinn í Hafnarfirði:
• Jóhannes sagði frá áherslum skólans á frumkvæði og athafnasemi nemenda í gegnum tíðina og stofnun hönnunardeildar.
• Ástþór sagði frá óvissu og byrjunarörðugleikum í norræna hópnum. Lítið hafði heyrst frá umsjónarmanni hans og lítil gagnkvæm samskipti á milli allra þátttakenda. Hins vegar höfðu norsku og sænsku skólarnir heimsótt hverjir aðra. Danskur iðnskóli sem upphaflega var í hópnum hafði dregið sig til baka og enginn hliðstæður skóli komið í staðinn enn sem komið er.
6. Næsti fundur
• Ákveðið var að halda næsta fund mánudaginn 15. des. n.k. kl. 12:00-17:00 í menntamálaráðuneytinu 4. hæð
• Fyrir næsta fund voru fundarmenn m.a. hvattir til að
a) huga betur að skilgreiningum á hugtakinu "entreprenörskap", hvað í því fælist og hvaða kröfur það gerði um kennsluhætti og námsaðstæður
b)meta þarfir sínar fyrir endurmenntun í tengslum við þátttöku í norræna verkefninu