Fundur á Sauðárkróki

Námsstefna fyrir íslenska þátttakendur í norræna verkefninu Entreprenörskap som utdanningsmål for ungdom á Sauðárkróki 2.-3. júní 1998.   Samantekt: Kristrún Ísaksdóttir   Þátttakendur: Fjölbrautaskóli Norðurlanda vestra á Sauðárkróki (FNV) Jón Hjartarson skólameistari Ársæll Guðmundsson aðstoðarskólameistari Valgeir Kárason   Foldaskóli: Kolbrún Ingólfsdóttir aðstoðarskólastjóri Andrea Maja Burgher Jóhanna Antonsdóttir   Framhaldsskólinn á Húsavík (FSH) Guðmundur Birkir Þorkelsson skólameistari Ingólfur Freysson   Iðnskólinn í Hafnarfirði (IH) Sveinn Jóhannsson aðstoðarskólameistari Ástþór Ragnarsson   Frá yfirstjórn verkefnisins: Kristrún Ísaksdóttir menntamálaráðuneyti Jón Hjartarson skólameistari FNV hafði veg og vanda af undirbúningi og stjórn fundarins.   Dagskrá: 1. Ráðstefnan í Bergendal - Svíþjóð 2. Norræna samstarfið og starfið í einstökum skólum 3. Nýting tölvutækninnar, einkum News Groups 4. Mat í og á verkefninu 5. Starfið innanlands á næstunni   Ennfremur fengu þátttakendur að kynnast og skoða skólastarfi og glæsilegum húsakynnum FNV auk ógleymanlegrar giljaþeysingar niður Jökulsá vestari.   1. Ráðstefnan í Bergendal - Svíþjóð Rifjað var upp það helsta úr sameiginlegum fyrirlestrum og vinnu einstakra hópa. Var almenn ánægja með ráðstefnuna bæði skipulag og innihald. Sjá frásögn af þessari ráðstefnu annars staðar á síðunni (undir „ráðstefnur"). 2. Norræna samstarfið og starfið í einstökum skólum.   2.1 Fjölbrautaskóli Norðurlanda vestra (FNV) Tengslahópur nr. 10. Jón F. Hjartarson var nýkominn af fundi í Lovisa í Finnlandi og reið á vaðið að segja frá starfinu þar. Það er eins og kunnugt er rafrænt fréttabréf sem gengur undir heitinu START (vefslóðin er http://start.fnv.is/) Samstarfsskólarnir hafa skipt með sér verkum. FNV ber ábyrgð á tæknilegri hlið og mati á verkefninu, Finnar sjá um fjármálahlið og samhæfingu og Danir um samantekt og skýrslugerð. Eftirtalin þemu verða tekin fyrir í START-blaðinu á næstunni - Tónlist - dægurmál - Skemmtiefni - spurningaleikir, frásögur - Sjálfsmynd unglinga, að vera ungur (Ung i Norden) - ljóð, sögur o.fl. - Fordómar sem uppspretta þekkingaröflunar (lönd, hefðir, kynslóðabil) - Upplýsingaefni - þemu - framtiðarplön - ársskýrslur o.fl. bundið við norræna verkefnið og markmið þess - Þrætubókarkafli (debatt) "kappræður" um ýmis málefni Ákveðið var að allt efni birtist á norðurlandamálum í blaðinu. Allir samstarfsskólarnir verða með samræmt kennsluprógram á sama tíma næsta vetur (á föstudögum) til að auðvelda bein tengsl og samskipti milli allra skóla. Föstudagsvinnan á að miða að því að nemandinn - sé fær um að breyta skjali og koma því inn á heimasíður - geti sett upp blað með því í handbragði sem krafist er - geti haft samskipti á netinu - hópvinna - kunni upplýsingaleit - upplýsingabanki - æfist í að greina þekkingu/upplýsingar og brjóta niður í þætti - geti rætt og hugsað - skilgreint hvað felist í innra frumkvöðli (intern entreprenör) - beri sameiginlega ábyrgð í hópi - eiga hlut í verkefni með öðrum Markmiðið er að byggja upp gott og víðlesið blað og byggja auk þess upp samhygð (samhörighet) og samvinnu á milli nemenda og skóla. START-hópurinn aðgreinir "innri" og "ytri" frumkvöðul: "Innri" frumkvöðull einkennist af sveigjanleika, frumkvæði, sköpunarkrafti, iðni og framkvæmdasemi á eigin forsendum, hvatningu og örvun (motivation för prestasjonen). "Ytri" frumkvöðull þekkist af því sem hann gerir s.s. framleiðslu, þátttöku og samvinnu í atvinnulífinu og a.k. athafnasemi útávið. Á sl. skólaári tók aðeins lítill hópur nemenda í FNV þátt í verkefninu í frítíma sínum. Næsta skólaár er ætlunin að tengja verkefnið öðru skólastarfi, setja frumkvöðlamennt með einhverjum hætti á stundaskrá og vinna að því hvernig gera má alla kennara að frumkvöðlakennurum.   2.2 Framhaldsskólinn á Húsavík Tengslahópur nr. 9: Ingólfur Freysson lýsti ákv. erfiðleikum í norræna hópnum þar sem danskur skóli er nýkominn inn í tengslanetið og erfitt var að finna samstarfsflöt við finnska fulltrúann sem starfar á háskólastigi en hinir á framhaldsskólastigi. Lítið skipulegt samstarf hefur farið fram til þessa. Finnskur grunnskóli mun koma til samstarfs á næstunni. Norski skólinn leggur áherslu á nemendafyrirtæki eins og FSH og þar eru góðir samstarfsmöguleikar. Ákveðið hefur verið að samstarfsskólarnir fari útí að gefa út rafrænt fréttablað og á að byrja á að skiptast á upplýsingum og koma nemendum af stað með samskipti á yrkinu. Í FSH er í bígerð að gera bækling um Húsavík og nærsveitir Í FSH er komin 6 ára reynsla af nemendafyrirtækjum og kennslu í atvinnufræðum. Þessi kennsla hefur verið í stöðugri þróun og á seinustu önn var hafin tilraun með skýrslugerð nemenda sem lið í námsmati til að efla vitund þeirra um verkefnið. Þessi kennsla hefur verið einangruð við eina námsgrein og einn kennara, en nú er kominn tími til að færa þetta yfir á allt skólastarfið í þverfaglegri starfsemi. Átak í þá veru á að hefjast í haust og á nýsköpunar- og frumkvöðlastarf að verða eitt af höfuðverkefnum skólans á næstunni. Þriggja til fjögurra manna teymi á að leiða þetta þróunarstarf. Lilja Jónsd. verður með námskeið 27. ágúst fyrir báða skólana á Húsavík.   2.3 Foldaskóli. 2.3.1 Tengslahópur nr. 2: Jóhanna Antonsdóttir sagði frá vinnufundi hópsins í Övre Vatt í Noregi í mars sl. þar sem unnin voru drög að framkvæmdaáætlun sem síðan var spunnið við í Bergendal. Fyrir þennan fund var megináhersla á nemendafyrirtæki, m.a. framleiðslu úr efnivið í umhverfi skóla, en ákveðið að leggja einnig rækt við hugmyndavinnu í anda nýsköpunarverkefnis Foldaskóla. Gengið er út frá þörfum nútímabyggðarlags. Nemendur í Foldaskóla munu skilgreina draumabyggðarlagið og gera síðan samanburð við Grafarvoginn og Reykjavík í reynd. Allir samstarfsskólarnir hafa samband sín á milli á netinu á föstudögum. Þeir ætla að útbúa norrænan kynningarkassa, kassa með farandsýningu á verkefnum skólanna. Foldaskóli byrjar. Nemendur Foldaskóla stóðu fyrir markaðsdegi í lok maí sl. þar sem þeir buðu framleiðslu sína til sölu. Ekki gekk nógu vel að selja og var það nemendum lærdómsríkt að mati kennara. 2.3.2 Tengslahópur nr. 1 Engum sem var á Bergendal ráðstefnunni blandaðist hugur um að verkefni yngstu nemendanna hefur farið vel af stað og tengslahópurinn vinnur vel saman. Sigurlaug komst ekki á fundinn og sagði Kolbrún frá því helsta. Að loknu verkefni um þjóðsögur og ævintýri tekur við verkefnið "Byggðin mín". Nemendur munu skiptast á myndbandi með leikjum og söngvum. Einnig verður samskiptabók "Billa" send á milli landanna. Nemendur kynna sig og segja frá hugmyndum sínum og nefna eitthvað eitt sem þeim finnst vanta í umhverfi sitt. Byggðin: Hvað má betur fara í Grafarvogi svo sem í húsagerð. Hvers vegna ekki kúluhús t.d.? Einnig umferðin og umferðarmenningin og verslun og viðskipti. Til viðbótar þessu samstarfi ætlar Andrea að vera lauslega tengd tengslahópi nr. 5 Hvað snertir framþróun nýsköpunar- og frumkvöðlastarfs í Foldaskóla er hugur í mönnum að vinna að frekari samþættingu innan skólans. Málið var tekið fyrir á kennarafundi í vor og viðhöfð þankahríð (brain-storming) um kosti og hindranir. Menn eru sammála um að með frekara kynningarstarfi megi kveikja þannig í kennurum að þeir sjái að þeir geti nýtt sér hugmyndafræðina og kennsluaðferðirnar á árangursríkan hátt.   2.4 Iðnskólinn í Hafnarfirði. Tengslahópur nr. 8. Ástþór Ragnarsson sagði frá því að enn væru fyrir hendi vandamál og óvissa innan norræna hópsins. Hinn norski formaður hópsins stakk af á miðri Bergendal ráðstefnunni og óvíst hvort hann eða skóli hans héldi áfram í verkefninu. Nýr formaður var valinn og er hann fulltrúi dansks starfsmenntaskóla sem er nýkominn inn í verkefnið. Lítið sem ekkert skipulegt samstarf hefur farið fram í hópnum til þessa. Í Bergendal ræddi hópurinn um hönnunar- og framleiðsluverkefni sem hver skóli kæmi að með ákveðnum hætti og er helst í bígerð að búa til skilti. Í Iðnskólanum í Hafnarfirði, ekki síst í hönnunardeildinni, fer fram margvíslegt skapandi starf og hugmyndavinna sem í eðli sínu er skylt markmiðum og aðferðum frumkvöðlastarfs. Stjórnendur og kennarar hafa hins vegar ekki gefið sér tíma til að skilgreina eða skipuleggja hvernig norræna verkefnið geti tengst skólastarfinu, auðgað það og fengið þar kjölfestu og útbreiðslu. Áframhaldandi þátttaka skólans í verkefninu veltur á því að þetta verði gert og var í því sambandi ákveðið að Kristrún kæmi á fund í skólanum við fyrsta tækifæri til að ræða málin. Ástþór taldi að byrjað hefði verið á öfugum enda. Rétt hefði verið að byrja á litlum hópi í eigin skóla - síðan í skólanum öllum, breiða svo út um landið og fara þaðan í norræna samvinnu og samstarf aðila út um heimsbyggðina.   3. Nýting tölvutækninnar, einkum News Groups Ákveðið var að setja á laggirnar ritnefnd fyrir íslensku heimasíðuna. Í henni ættu sæti Gísli Þorsteinsson KHÍ, sem hefur tekið að sér að byggja upp heimasíðuna og hafa umsjón með henni, ásamt einum grunnskólakennara og einum framhaldsskólakennara. Ingólfur og Skúli voru valdir í ritnefndina með Gísla Eftir að fundarmenn höfðu þreifað sig áfram með News Groups í tölvustofu FNV undir leiðsögn Valgeirs og rætt um kosti og galla póstlista og fréttahópa sem tæki til faglegrar umræðu komust menn að þeirri niðurstöðu að fréttahópar væru betri að því leyti að þar sést á auðveldan hátt hvernig umræðan byggist upp, hverjir bregðast viðhvaða máli og í hvaða röð o.s.frv. Var ákveðið að Kristrún í samráði við Gísla sjái til þess að stofna News-Group fyrir íslenska netið.   4. Mat í og á verkefninu Ársæll hafði framsögu um mat á skólastarfi, enda sérmenntaður í þeim fræðum, og lagði fram gagnlegt rit um það mál í eigin samantekt. Hann lagði áherslu á að við yrðum að leggja mat á ferlið frá upphafi þátttöku í frumkvöðlaverkefninu og þar til því lýkur. Hvað gerist? Hvaða breyting á sér stað, m.a. á viðhorfum? Sjálft matsferlið er mjög mikilvægt - í því fólgin vitundarvakning og innbyggð gæðastýring að vissu marki. Hann tók útgangspunkt í 6 spurningum sem verður að svara áður en farið er af stað. Hver er tilgangur matsins? [Úr umræðunni: Er tilgangurinn einvörðungu að veita upplýsingar, örva og efla gæði eða er eftirlit aðalatriðið þar sem aðilar á hverju stigi líta eftir þeim á stiginu fyrir neðan (t.d. að NSS lítur eftir stýrihópi sem lítur eftir stjórnendum einstakra skóla sem líta eftir kennurum sem líta eftir nemendum!!!)] Hvað á að meta? Hvernig á að meta? (Bæði megindlegar og eigindlegar aðferðir nauðsynlegar). Hver á að meta? (óþarfi að fá utanaðkomandi aðila) Hvernig á að birta niðurstöður mats? Hvernig má nýta niðurstöðurnar? Ársæll lagði áherslu á að matið yrði að vera á þremur plönum - hver skóli - hvert land - norræna verkefnið í heild. Mikilvægt er að hjálpast að við skilgreiningar á viðmiðum. Markmiðin með norræna verkefninu taldi hann ekki nógu skýr .   5. Starfið innanlands á næstunni Í umræðum kom á daginn að þátttakendur höfðu mesta þörf fyrir að ræða og skilgreina grundvallarmarkmið verkefnisins, þ.e. frumkvöðlastarfs með nemendum. Niðurstaða þeirra var að um væri að ræða FJÓRAR MEGINSTOÐIR og tók hver skóli að sér að leiða umræðuna á netinu á hausti komanda eins og hér segir:   1. Efla frumkvæði- LEYFA NEMENDUM AÐ BLÓMSTRA (FSH) 2. Efla samvinnu og samábyrgð - samkennd (siðvit) (IH) 3. Gera nemendur læsa á um hverfi sitt (Foldaskóli) 4. Hvernig má nýta matsaðferðir til að þróa frumkvöðlamennt? (FNV)   Í þessu töldu þátttakendur að lægi kjarni málsins sem kennarar þurfi að hafa sem leiðarljós í kennslu sinni. En hvernig á að fara að? Erfiðast töldu kennararnir vera að efla frumkvæði hjá nemendum og að fá þá til að vinna saman í hópum þar sem þekking er sett í nýtt samhengi. Þátttakendur töldu mikilvægt að vinna saman í hinu íslenska tengslaneti að því að skýra markmiðin og þróa leiðirnar. Því var ákveðið að hefja faglega umræðu á netinu (News Groups) um þessar 4 meginstoðir eða þemu og skuldbundu skólarnir sig til að hefja og halda utanum umræðu um einstök þemu eins og að ofan greinir frá 18. sept. og fram eftir hausti.   Tímasetningar: Kristrún tilkynnir um News group og blæs í lúðra um 1. sept. Fyrstu innlegg skólanna 18. sept. á News group. Umræða varð um hvort ekki væri rétt að taka tiltekinn tíma í hvert þema, t.d. 2-3 vikur, en sumum þóttu viðfangsefnin skarast þannig að réttast væri að hafa allt undir í einu og varð niðurstaðan sú. Rætt var um mikilvægi útbreiðslustarfsemi og var í því sambandi ákveðið að JFH hefði samband við staðarblaðið Feyki og fá þar birt viðtöl og myndir.   Þátttakan í norrænum fréttahópum? Hvað á að vera á skandinavísku og hvernig á að koma hlutum til skila úr íslensku umræðunni inn í norræna samstarfið? Hver á að gera hvað? Kristrún ber ábyrgð á því að senda útdrátt eða frásögn af sameiginlegum fundum innanlands inn í norrænan fréttahóp eða á íslensku vefsíðuna sem tengist þeirri sameiginlegu. Einnig að miðla fréttum úr stýrihópi til íslenska netsins. Hvert verkefni/skóli ber ábyrgð á upplýsingagjöf í norrænu samhengi og öfugt inn til íslenska netsins.   Þróunaráætlanir - Framkvæmda- og fjárhagsáætlanir Kristrún auglýsti enn eftir áætlunum frá skólunum og ítrekaði mikilvægi þess að menn gefi sér tíma í hverjum skóla til að skilgreina verkefni sín, markmið, leiðir, mat og kostnað (um er að ræða sams konar áætlun og krafist er þegar sótt er um í þróunarsjóði grunnskóla og framhaldsskóla). Mottóið er að ef þú getur ekki áætlun er hætt við að þú vitir ekki nógu vel hvað gjöra skal, eða eins og stendur á góðum stað "If you aim at nothing, you will be sure to hit"! Foldaskóli skilaði grófu yfirliti á fundinum. Aðrir skólar lofuðu að senda sínar áætlanir á næstu vikum.   Þörf fyrir faglegan stuðning og endurmenntun Það var almennt mat þátttakenda að mesta þörfin væri fyrir námskeið í nýtingu tölvutækni í kennslu. Hvenær verður næsti stórfundur og hvar? Ekkert ákveðið en rætt um að stefna að öðrum svona fundi á vorönn 1999. Norræna ráðstefnan næsta vor. Kristrún sagði frá því að næsta norræna ráðstefna í verkefninu yrði hérlendis næsta vor. Ekki gafst tími til að ræða staðsetningu og tilhögun frekar. Fleira ekki gert.  Til baka