Breiðafjörður er víðfeðmasta sjávarsvæði friðlýst á Íslandi eða alls um 3000 ferkílómetrar. Eyjarnar á firðinum hafa verið sagðar óteljandi en eru um 2800. Fjörur eru mikilvæg lífsvæði og líffræðileg áhrif þeirra ná langt upp á land og út á hafsvæði. Líklega er um helmingur af íslenskum fjörum við Breiðafjörð sem sýnir hve mikilvægt svæðið er fyrir lífríki landsins. Í mörgum eyjanna er mikil gróska og margar tegundir plantna. Stór hluti af stofnum fugla eins og lunda, æðarfugls og teistu er á firðinum, um 90% af skörfum landsins verpir þar og rúmlega helmingur arnarstofnsins. Um fimmtungur landsela við Ísland og allt að helmingur útsela kæpir við Breiðafjörð og smáhvelir eru algengir.

Búið hefur verið í Breiðafjarðareyjum síðan land byggðist. Miklar og óvenju fjölbreyttar mannvistarleifar bera margbreytilegu atvinnulífi glöggt vitni, íbúðarhús, matjurtagarðar, bryggjur, verbúðir, dúnhús, útsýnisturnar, réttir og margt fleira.

Helstu markmið laganna um vernd Breiðafjarðar eru að vernda landslag, jarðmyndanir, lífríki og menningarminjar. Einnig að tryggja almenningi aðgang að náttúru fjarðarins og sögu án þess að spjöll hljótist af. Lögin eiga líka að stuðla að auknum rannsóknum á lífríki og jarðfræði Breiðafjarðar og renna stoðum undir eyjabúskap og aðra hefðbundna nýtingu hlunninda í Breiðafirði.