Þörf þótti á að byggja upp nám á sviði margmiðlunar sem byggir á
forsendum hönnunar, þar sem nemendum er kennt að nýta sér hina nýju tæknimiðla á
gagnrýninn hátt og út frá þekkingu á fagurfræðilegum, sögulegum og
félagslegum forsendum allra þeirra greina sem að margmiðlun koma. Fjallað
verður um forsendur brautarinnar og sérstöðu innan íslensks menntakerfis,
skipulag og inntak námsins.

Birgir Edwald aðstoðarskólastjóri, Barnaskóla Eyrarbakka og Stokkseyrar.

Rætt verður um tölvuvæðingu grunnskóla og hvernig ætti að standa
að henni. Ég er kerfisfræðingur og starfaði sem slíkur 1996-97. Þá vann ég
við að tölvuvæða ýmiskonar rekstur m.a. bakarí og húsgagnsmíði og þegar ég
kom aftur til starfa við grunnskóla finnst mér sú reynsla nýtast mér við þær
breytingar sem gera þarf í skólastarfi.
Ég skrifaði ritgerð í ágúst sem heitir „Nýir tímar - ný verkefni" sem
lýsir því hvernig við hér á Eyrarbakka og Stokkseyri teljum að standa eigi
að þessum málum.

Leifur Geir Hafsteinsson ráðgjafi hjá Áliti hf.

Kynning á tilraunaverkefni Álits og tveggja framhaldsskóla sem felst í að Álit keyrir þrjár nettölvur í hvorum skóla sem staðsettur er hjá Áliti. Valinn hópur kennara og nemenda var fenginn til að prófa viðmótið. Reifaðir kostir og gallar uppsetningarinnar.

Fríða S. Haraldsdóttir, skólasafnskennari, Hafsteinn Karlsson skólastjóri, Margrét Sólmundsdóttir tölvukennari, Sigríður Einarsdóttir myndmenntakennari og Sigrún Helgadóttir náttúrufræðikennari, Selásskóla.

Á skólasafni Selásskóla er nú unnið metnaðarfullt starf sem miðar að því að þjálfa nemendur í að nýta sér ólíka miðla til að afla sér upplýsinga. Bækur, margmiðlunardiskar og Netið eru notuð jöfnum höndum af nemendum í þeim efnum. Samin hafa verið sérstök verkefni sem hver bekkur vinnur og eru þau mismunandi eftir aldri nemenda. Verkefnin snerta ýmsar námsgreinar og er lögð áhersla á að hafa innihald þeirra í samræmi við námskrár í mismunandi námsgreinum, þannig að ekki er aðeins verið að kenna upplýsingaleit, heldur er upplýsingaleitin þáttur í að leysa raunveruleg verkefni. Sem dæmi má nefna verkefni um risaeðlur, eldfjöll og himingeiminn með áherslu á náttúrufræði, verkefni um Íslandssögu sem meira snýr að samfélagsfræði og verkefni um tröll sem snertir myndmennt, ritun o.fl.

Hér er um samþætt verkefni að ræða og þau eru afar krefjandi. Auk skólasafnskennara taka tölvukennari, umsjónarkennari hvers bekkjar, náttúrufræðikennari og myndmenntakennari þátt í þessu starfi. Oftast eru þrír kennarar með hvern bekk í þessari vinnu samtímis. Það er mögulegt með því að nýta skiptistundir og hafa sveigjanleika í stundatöflu kennara.

Þuríður Jóhannsdóttir kennari, Menntaskólanum við Hamrahlíð.

Fjallað verður um hvað einkennir þróunarferli upplýsingatækni í skólastarfi með því að greina stöðuna á fyrsta stigi þróunar (en á því höfum við verið) það er stig er einkennist af starfi öflugra frumkvöðla. Við virðumst nú vera að færa okkur yfir á næsta stig með stofnun þróunarskólanna. Fjallað verður um hvernig þurfi að standa að verki á því stig til að vel til takist. Byggt verður á kenningum Betty Collis o. fl. fræðimanna á þessu sviði.

Sigrún Gunnarsdóttir tölvunarfræðingur, Landssíma Íslands.

Þetta verkefni mætti nefna „Félagsleg áhrif upplýsingatækni á skóla, heimili
og samfélagið".
Tilgangur þess er að rannsaka áhrif á samskipti nemenda, kennara og foreldra
þegar upplýsinga- og fjarskiptatækni er beitt í kennslu. Í verkefninu
verður notaður margs konar kennslu- og fjarfundabúnaður. Reynt verður að
meta magn og gæði samskipta nemenda, foreldra og kennara innbyrðis og einnig
út í samfélagið. Jafnframt verður skoðað hvernig viðhorf fólks sem tekur
þátt í verkefninu breytist við innleiðingu þessa búnaðar. Áhersla verður
lögð á grunn- og framhaldsskóla.
Niðurstöður verkefnisins verða viðmiðanir um það hvernig hægt sé að innleiða
fjarskipta- og kennsluhugbúnað í skólastarf með því markmiði að auka
samskipti nemenda, foreldra og kennara.

Sigurður Hannesson sérfræðingur, Landssíma Íslands.

Lýst verður fjarkennsluhluta rannsóknarverkefnis ATM rannsóknarnet á Íslandi.
Þetta mun verða svolítið tæknilegur fyrirlestur, þ.e. lýst verður hvernig
háhraðanet ATM virkar og hvaða kosti það hefur umfram ISDN fjarskiptatækni.
Einnig verður lýst fjarkennsluhugbúnaði þeim sem notaður er í
rannsóknarverkefni þessu sem ber nafnið ISABEL. Það er hugbúnaður sem
hannaður er fyrir kennslu og/eða ráðstefnuhald, þ.e. margir geta verið tengdir
inn á fyrirlesturinn og auðvelt er að fylgjast með öllum sem eru
þátttakendur í fyrirlestrinum.

Atli Harðarson framhaldsskólakennari, Fjölbrautarskóla Vesturlands.

Í drögum að nýrri aðalnámsskrá fyrir grunnskóla koma fram hugmyndir um að kenna
forritun í 4. til 7. bekk. Ég mun ræða nokkuð reynsluna af forritunarkennslu
í grunnskólum, hvaða tilgangi slík kennsla geti þjónað og hvaða möguleikar
séu á að hún skili árangri. Síðan sný ég mér að framhaldsskólanum og segi
frá því í nokkrum orðum hvernig kennsla í forritun hefur þróast þar, hvers
vegna mikilvægt er að efla hana og hvernig ég álít að það verði best gert.
Saman við þessar vangaveltur flétta ég bæði frásögn af ráðstefnu um notkun
Logo-málsins í skólum sem haldin var í Búdapest sumarið 1997 (Eurologo 1997)
og eigin reynslu af að kenna forritun í framhaldsskóla undanfarin 12 ár.

Guðrún Geirsdóttir lektor í uppeldis- og menntunarfræði, Háskóla Íslands.

Undirbúningur kennaranema við H.Í. í upplýsingaþjóðfélagi.
Í erindinu verður fjallað um tilraunir Háskóla Íslands til að þjálfa
kennaranema í notkun upplýsingatækni og undirbúa þá undir kennslu í
upplýsingaþjóðfélagi. Rætt verður um mat á stöðu nemenda, kröfur sem
gerðar eru til kennara á sviði upplýsingatækni og fjarkennslu og þær leiðir
sem valdar hafa verið til að reyna að mæta þeim kröfum.

Guðbjörg Sigurðardóttir formaður verkefnisstjórnar um upplýsingasamfélag, forsætisráðuneyti.

Erindið fjallar um framkvæmd stefnunnar um íslenska upplýsingasamfélagið. Sagt verður frá skipulagi verkefnisins og verkefnisstjórn. Einnig verður gerð grein fyrir fjárveitingum til upplýsingatækniverkefna á árinu 1999 og vinnu við fjárlagatillögur vegna ársins 2000.

Rögnvaldur Ólafsson dósent í eðlisfræði, Háskóla Íslands.

Staða íslenskunnar í upplýsingasamfélagi framtíðar, hvaða hættur steðja að henni, hvað þarf að gera til að tryggja stöðu hennar og hvað stjórnvöld eru að aðhafast á þessu sviði. Kynning á skýrslu um tungutækni sem Rögnvaldur hefur ritstýrt fyrir menntamálaráðuneytið.

Snæbjörn Kristjánsson verkfræðingur, Rannsóknarráði Íslands.

Með bréfi dagsettu 16. febrúar 1998 fól menntamálaráðherra, Björn Bjarnason, Rannsóknarráði Íslands að semja markvissa áætlun, þar sem lögð væri áhersla á tvö meginsvið í rannsóknum og þróunarstarfi, þ.e. á sviði upplýsingatækni og umhverfismála í ljósi gildis þeirra fyrir þróun íslensks þjóðfélags. Stefnt verði að því að Íslendingar nái mælanlegum árangri í rannsóknum og þróun á þessum tveimur meginsviðum. Sérstök áhersla er lögð á að auka þátttöku ungs vísindafólks í þessu starfi og þverfaglega samvinnu vísindamanna. Höfð verði hliðsjón af stefnu ríkisstjórnarinnar varðandi upplýsingatækni og umhverfismál. Ráðuneytið lýsir yfir vilja til að beita sér fyrir því við gerð fjárlagafrumvarps að teknar verði ákvarðanir um fjárveitingar í þessu skyni án þess að þær raski öðrum áætlunum Rannsóknarráðs Íslands.

Ráðið kvaddi starfshópa til að gera tillögur til ráðsins um markáætlanir á mikilvægum rannsóknarsviðum. Þeir fjölluðu um eftirfarandi svið:

• Upplýsingatækni

• Umhverfi og sjálfbæra þróun

• Umhverfi og atvinnulíf

• Umhverfi og lífríki

• Samfélag og menningu

Að fengnum tillögum þessara hópa ákvað ráðið að fella þær undir tvær meginyfirskriftir: Upplýsingatækni og umhverfismál.

Arnór Guðmundsson deildarsérfræðingur, menntamálaráðuneyti.

Valdir hafa verið þrír grunnskólar og þrír framhaldsskólar til að vera þróunarskólar í upplýsingatækni og munu þeir á næstu fjórum árum vinna að mótun aðferða til að beita upplýsingatækni við nám, kennslu og almennt í skólastarfi. Einnig er skólunum ætlað að miðla öðrum skólum og kennurum af reynslu sinni og þekkingu á sviði upplýsingatækni. Í erindinu verður gerð grein fyrir skipulagi og innihaldi þessa verkefnis.

Jóhann Ásmundsson faglegur umsjónarmaður aðalnámskrár, menntamálaráðuneyti.

Fjallað verður um þátt upplýsingatækni í nýjum aðalnámskrám grunn- og framhaldsskóla, hvernig hún kemur inn sem verkfæri í hverri námsgrein auk þess sem faglegt viðfangsefni. Fjallað verður sérstaklega um nýtt námssvið upplýsinga- og tæknimennta.

Sólveig Jakobsdóttir lektor í fjarkennslufræðum, Kennaraháskóla Íslands.

Greint verður frá helstu niðurstöðum ýmsissa rannsókna
sem sýna að umtalsverður kynjamunur er víða til staðar í tengslum við
tölvu- og Netnotkun barna, unglinga og kennara. Hún mun svo bera saman
skóla, þar sem lítill kynjamunur virðist vera til staðar í viðhorfum og
færni nemenda tengdum tölvum, við skóla þar sem mikill munur virðist vera á
þessu sviði og benda á hugsanlegar ástæður sem tengjast ýmsum þáttum í
tölvumenningu skóla og umhverfis. Kynntar verða leiðir sem skólar gætu
farið til úrbóta.

Hilmar Þórðarsson og Ríkharður H. Friðriksson forstöðumenn Tónvers Tónlistarskóla Kópavogs.

Fjallað verður um stöðu tölvutækni í tónlistarkennslu og þá möguleika sem
hún getur boðið upp á í framtíðinni. Sérstaklega verður litið til sviða eins og upplýsingaöflunar, fræðigreinakennslu, tölvutónsmíða og nýjar greinar eins og tónlistartækni.

Lára Stefánsdóttir deildarstjóri tölvudeildar, Sverrir Páll Erlendsson vefritsjóri, Valdimar Gunnarsson kennari, Menntaskólanum á Akureyri.