Verkfæri
Tölvur, hugbúnaður og net eiga að vera verkfæri í skólastarfi á öllum skólastigum. Nemendur, kennarar og annað starfslið eiga að geta beitt þeim við nám og kennslu, rannsóknir, þróun, samskipti og stjórnun. Tæknin á hvorki að vera til trafala né lýta; verkfæri eiga að láta lítið yfir sér en vera innan seilingar þar sem þeirra er þörf.

Nemendur
Nemendur fá með hjálp tölvutækninnar aukin tækifæri til að afla þekkingar, gera tilraunir, miðla öðrum, eiga samskipti, leika sér, hljóta þjálfun og öðlast leikni á ótal sviðum. Þeir fá öflugt verkfæri í hendur, geta borið aukna ábyrgð á námi, lagt meira af mörkum sjálfir og fengið ýmsan stuðning án afskipta kennara.

Kennari
Kennari þarf síður að beita beinni miðlun og yfirferð og getur fremur verið til leiðsagnar um vinnubrögð, bent á upplýsingalindir, farið á milli og leiðbeint stökum nemendum, vakið kapp og áhuga, beint leit í sameiginlega farvegi, veitt félagslegan stuðning, stuðlað að virkum samskiptum og góðum anda.

Samskipti
Tengsl milli fólks geta átt sér stað óháð tíma og rúmi. Fjarlægðir verða þýðingarminni og fötlun hindrar síður samskipti. Upplýsingatæknin getur stuðlað að agaðri samskiptum og virkari þátttöku. Tæknina má nota til að halda utan um umræður, spjall og hugmyndir hvort sem um er að ræða fjarnám eða staðnám. Netnámi verður beitt í báðum tilvikum.

Tölvur
Tölvum og nettengingum fjölgar í skólum. Þess er ekki endilega langt að bíða að ein eða fleiri tölvur skjóti upp skjánum í hverri stofu og öllum greinum. Tölvur geta verið stakar eða í hnapp á göngum og bókasafni. Nota má færanlegar tölvur og hafa tengingar um allt. Tölvuver geta verið fartölvur á vagni og netsambandið þráðlaust. Svo má ekki gleyma að tölvur geta sprottið upp úr töskum og vösum nemenda.

Hugbúnaður
Hugbúnaðargerð til náms og kennslu fleygir fram og reynt er að tryggja stöðu íslenskrar menningar, tungu og staðhátta í þeirri þróun. Ýta þarf undir nýsköpun og þýðingar. Helstu notendaforrit, stýrikerfi og væntanleg tungutækni þurfa líka að vera á íslensku. Kennslustofa framtíðar verður íslensk og alþjóðleg í senn.

Keppikefli
Kennslustofa framtíðar felst í þróun sem er hafin en verður seint lokið. Hún kostar nám, vinnu og peninga svo að fátt eitt sé nefnt. Kennslustofa framtíðar felst í viðleitni, framsækni, áhuga, vilja til góðra verka, mistökum, stórum og smáum skrefum. Kennslustofa framtíðar byggir á nútíð. Kennslustofa framtíðar er núna.

Torfi Hjartarson forstöðumaður gagnasmiðju KHÍ

25.02.1999